Bandièra01 1180x150: Comuna de Tolosa

Actualitats

Mahmud Abbas renóncia als Acòrdis d'Òslo

Lo president de l’Autoritat Palestiniana anoncièt la fin del ròtle dels Estats units coma mediator del conflicte, en causa son favoritisme envèrs Israèl

| Anadolu Agency/Getty Images
Lo president de l’Autoritat Palestiniana, Mahmud Abbas, renoncièt ièr dimècres als Acòrdis d’Òslo e a quin autra signatura de patz en consequéncia de la decision del president estatsunidenc de reconéisser Jerusalèm coma capitala d’Israèl. “La decicion sus Jerusalèm nos libèra de tot acòrdi qu’ajam signat, per exemple los acòrdis d’Òslo. Los signèrem, mas ara son pas constrenhents per nosautres”, çò declarèt Abbas durant una cima extraordinària de l’Organizacion per la Cooperacion Islamica Istambul.
 
“La decision de Trump ofrís Jerusalèm a Israèl coma un present, quicòm d’unilateral, coma se lor donèsse una vila estatsunidenca”, çò apondèt. “Aquela decision reformçarà de grops extremistas per transformar un conflicte politic en un de religiós”. Dins aquel sens planguèt que “just al moment que pensàvem que poiriam trabalhar ensems per una patz larga, Trump a fach lo contrari, el a provocat lo mond”.
 
Abbas tanben avancèt que ne parlarà amb lo Conselh de Seguertat de l’ÒNU e demanarà qu’apròve una resolucion qu’anulle l’anóncia del president estatsunidenc. Atanben demandèt que s’impause de sancions o pressions economicas contra los Estats Units.
 
 
Se desengatjar dels acòrdis d’Òlso
 
Los acòrdis d’Oslo foguèron signats en setembre de 1993 entre l’Organizacion per la Liberacion de Palestina (ÒLP) e pel govèrn d’Israèl, e permetèron la creacion de l’Autoritat Nacionala Palestiniana qu’administra una partida dels territòris de la Lista de Gaza e de Cisjordania.
 
De fach, ja en octòbre de 2015, Abbas anoncèt que podiá pas mai “restar engatjat legalament per aqueles acòrdis signats e qu’Israèl deu assumir totas sas responsabilitats coma un poder ocupant, pr’amor que l’statu quo pòt pas contunhar”, çò diguèt.
 
Mas ara Abbas a quitament insinuat que poiriá abandonar d’afars administratius civils, coma los servicis de la santat, e retornar tota la responsabilitat a Israèl. “Nosautres avèm pas cap d’autoritat. Perqué nos n’auriam de responsabilizar? Vosautres sètz l’Estat ocupant”, çò diguèt. “Sèm pas mai engatjats amb cap acòrdi”, çò insistiguèt lo cap palestinian dins un discors ont anoncièt la fin del ròtle dels Estats units coma mediador del conflicte, per son favoritisme devèrs Israèl.




abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
1.

Cresi que lo que haurien de demanar los palestins es tamben que fossi Jerusalem la capitala de Palestina. Cresi que non tot lo qu' ha dit lo Trump ha estat negatiu, tamben ha parlat de patz entre las duas parts.
Cal a un folh seguir-li la corrent, a veire se's pot aconseguir qualque causa.

  • 1
  • 0

Escriu un comentari sus aqueste article