La societat francesa de camins de fèrre (SNCF) decidiguèt de suprimir la sola linha dirècta que traversava Occitània. Lo tren istoric apelat “Le Grand Sud”, que jonhiá Niça e Bordèu, via los Arcs, Tolon, Marselha, Tolosa e Agen, desapareguèt lo 10 de decembre passat. Ara lo tren Intercité 4659 que partís de Bordèu a 10h30 aurà son terminus a Marselha e arribarà pas a Niça. Tanben l’Intercité 4760 que partís de Niça a 10h22 aurà son terminus dins la Ciutat Focèa.
 
La decision de l’SNCF a pas brica agradat als usatgièrs que viatjavan sus aquela linha ni quitament als salariats de la societat que planhon de licenciaments e la privatizacion de la societat. De nombrosas familhas, seniors, estudiants, chaminòts e d’autres an lançat una protèsta en linha sus change.org per recuperar la linha Niça-Bordèu. Ara deuràn cambiar de tren a Marselha, çò qu’alongarà un temps de percors “important a causa de la politica del tot-TGV”, çò dison. En mai d’aquò, denóncian lo malaise suplementari de las rompeduras de correspondéncias en cas de retards e tanben la constrencha suplementària dels bagatges. “S’agís d’un novèl pas vèrs la fin del servici public ferroviari que la desira accelerar lo president Macron”, çò afirman.
 
 
Niça-Bordèu via París
 
L’aplicacion de l’SNCF recomanda de passar per París. Lo 15 de decembre passat, aquela aplicacion recomandava un trajècte Niça-Bordèu via París en TGV a 138,50 èuros amb un temps de trajècte de 8h56. A París cal cambiar d’estacion en mètro o taxi.
 
Per contra, abans que la linha foguèsse suprimida, lo trajècte dirècte entre los dos extrèms d’Occitània costava 70 èuros e lo temps de trajècte èra de 9h04.
 
 
Privatizacion del transpòrt public
 
Los signataris d’aquela protèsta en linha deploran l’estrategia del president de l’SNCF, Guillaume Pepy, e de l’estat, “a desmantelar lo servici public SNCF fins a son imminenta privatizacion”. D’efièch, Pepy afirmèt qu’aquela privatizacion “fariá baissar los prèses amb la dobertura a la concurréncia”.
 
Podètz signar sus change.org