Lo compte de Twitter del fondador de Wikileaks, Julian Assange (@julianassange), despareguèt durant qualques oras del ret social dins la mièja nuèch passada de dimenge a diluns. Aquel fach a descadenat de polemicas sul ret e qualques unes an quitament parlat d’una eventuala censura de Twitter.
 
Totun, quand s’ensajava d’accedir a son compte se vesiá pas lo messatge qu’apareis abitualament quand un compte es estat escafat, mas sonque un autre messatge que disiá qu’aquel compte existissiá pas. Aquò fa pensar que foguèt lo quite Assange que l’aviá suprimit. Lo compte sembla qu’es restituit e per ara Assange a pas res dich a aquel subjècte.
 
La desaparicion del compte provoquèt fòrça especulacions mentre qu’apareissián de desenas de comptes qu’afirmavan èsser lo nòu compte d’Assange.