Lo nòu Chromebook es basat sul sistèma operatiu dins la nívol Chrome OS e se vend ja als Estats Units e al Reialme Unit.

Google e Samsung an presentat lo nòu Chromebook, un ordenador portable amb lo sistèma operatiu Chrome OS, que se remarca sustot pel prètz: 249 dolars (190 èuros). La maquina a un ecran de 11,6 poces e es capabla de s’entraïnar en mens de dètz segondas. Los Chromebooks son l’escomesa de Google dins lo mercat dels ordenadors. Per ara, aquel modèl se distribuís als Estats Units e al Reialme Unit.
 
S’agís d’aparelhs qu’intègran lo sistèma operatiu dins la nívol Chrome OS. Fins ara, Google n’aviá presentat qualques modèls e n’aviá perfeccionat lo sistèma, mas sa preséncia al mercat es encara fòrça luènh d’aquela de las maquinas amb MacOS e Windows.
 
Lo nòu Chromebook, fabricat per Samsung, visa d’èsser una opcion economica qu’encoratge los usatgièrs a ensajar las possibilitats de Chrome OS. Google ne soslinha l’ecran d’11,6 poces, l’espessor de 0,8 centimètres e lo pes d’1,1 quilo coma principalas especificacions. L’ordenador fonciona amb Chrome OS e, per aquò, lo sistèma s’executa dins la nívol. En çò que tanh al processor, emplega un Exynos 5 de doble nuclèu. L’aparelh a una camèra VGA, un connector USB 3.0 e un autre 2.0, e mai de connectors HDMI e Bluetooth. L’autonomia de la batariá es de 6,5 oras, en dependent de l’usatge.
 
Google ofrirà tanben als usatgièrs 100 gigabytes d’espaci al servici de la nívol Google Drive, a gratis, pendent dos ans.