La societat Apple a reconegut pel primièr còp çò que mai d’un usatgièr sospechava, çò es qu’alentís los modèls d'iPhone mai vièlhs.
 
Lo gigant informatic de Cupertino ditz que o fa pas per forçar lo mond de crompar d'aparelhs nòus mas per adaptar los esmartfòns pus ancians a lors mesas a jorn del sistèma operacional e, atal, lor perlongar la vida. Es a dire, que segon la societat de la poma, aquel alentiment ne melhora lo rendement e evita de problèmas amb las batariás, car l'aument d'activitat de las nòvas versions poiriá provocar d'arrèstes sobdes dels aparelhs.
 
Mas aquela explica a pas convencut la majoritat dels usatgièrs que planhián aquela practica dempuèi un an mentre qu’Apple la reconeissián pas. Los usatgièrs considèran qu'aquel alentiment de lors esmartfòns s'es fach sens lor consentiment e que concernís un produch qu'es fòrça car. Per aquela rason plusors d’eles an menaçat de cromprar pas los nòus modèls d'Apple mas los d'autras societats.
 
Totun, aquela estrategia es estada fòrça profechosa per Apple, que dètz ans après la presentacion del primièr iPhone sas vendas creisson de contunh. Dempuèi 2007 n'an vendut mai de 1,2 miliards d'aparelhs e es vengut lor produch principal. Aquò se pòt remarcar sus las accions del gigant de Califòrnia a la borsa, qu'an atench de nivèls recòrd: Apple val ara mai de 900 miliards de dolars.