Bandièra01 1180x150: Comuna de Tolosa

Actualitats

Diá: an barrat la maternitat e la cirurgia d’urgéncia

Malgrat una fòrta mobilizacion ciutadana, la vila del Bas Daufinat es ara privada d’aqueles servicis espitalièrs

| Collectif de défense de l\'hôpital de Die
Dempuèi lo 31 de decembre Diá a pas pus de maternitat ni mai de cirurgia d’urgéncia. Malgrat una fòrta mobilizacion ciutadana, la vila del Bas Daufinat es ara privada d’aqueles servicis espitalièrs, çò rapòrta Reporterre. Desenant, los nafrats e las femnas prenses deuràn anar a Valéncia o a Gap, çò es a una ora e mièja de rota del país diés, s’an l’astre de trobar pas de nèu o d’estradas glacinadas.
 
Lo 24 de novembre passat, la ministra francesa de la santat anoncièt la barradura de la maternitat e de la cirurgia d’urgéncia de l’espital de Diá, amb l’aprobacion de la deputada e dels elegits locals. En contrapartida, prometèt de renovelar l’espital e l’arribada d’un bèl elicoptèr.
 
Lo quotidian ecologista denóncia “la longa degradacion organizada d’un espital publica daissat a l’abandon dempuèi d’annadas”. Dins aquel sens, Reporterre denóncia qu’aquela situacion es arribada “en acusant son can de la ràbia”, coma o diguèt Noam Chomski. Aquò significa qu’an daissat l’espital se deteriorar dempuèi 31 ans e qu’an “jogat sus la paur dels abitants”.
 
Per justificar aquela barradura, an dich que i aviá pas pro de jasilhas per manténer las qualificacions dels mètges, sens prene en compte las frequentas jasilhas a domicili qu’an luòc a Diá, qu’èran possiblas gràcias a la proximitat de la cirurgia de l’espital en cas de complicacions.
 
Los dieses se son plan batuts per servar aqueles servicis de santat al país. Après de longassas protèstas e quitament de denóncias a la justícia, res a pas foncionat. Mas an anonciat que contunharián de luchar.
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Bernatmm Tarba
1.

Eth ja vielh eslogan "Que volem viuer au País"
comença per un "Que volem neisher au País"

  • 1
  • 0

Escriu un comentari sus aqueste article