Bandièra01 1180x150: Comuna de Tolosa

Actualitats

L’enquèsta judiciària sus la mòrt de Rémi Fraisse s’acaba sus un non-luòc

Los dos jutges encargats d'instruire lo dorsièr de la mòrt, en Galhaqués e en 2014, del jove tolosan an desliurat una ordenança de non-luòc en favor del gendarma

| Thierry Ehrmann
L’enquèsta judiciària sus la mòrt de Rémi Fraisse finís sus un non-luòc, coma ben cranhiá arunan Jean-Pierre Fraisse, lo paire del jove tolosan tuat en octòbre de 2014 per una granada. La lancèt un gendarma dins l’encastre de la repression d’una protèsta contra la construccion d’una restanca a Sivens (Galhaqués).
 
Los jutges encargats de l'instruccion de la mòrt de Fraisse rendèron dimars passat una ordenança de non-luòc en favor del gendarma que tirèt la grenada que tuèt lo jove tolosan, çò rapòrta BFM-TV.
 
Per Jean-Pierre Fraisse, "la justícia es als òrdres, la rason d'estat e dels govèrns successius a prevalgut mentre que i aviá pas cap de rason puèi que i a mòrt d'òme".
 
La justícia clavèt l'instruccion en genièr de l'an passat, après mai de dos ans sens mesa  en examen de quin responsable que foguèsse. Alavetz, los avocats de la familha faguèron lors denóncias contra los responsables civils e militars del drama. Dins aquel sens se denoncièt los gendarmas per “falses testimoniatges” e “subornacion de testimònis”.
 
 
Una protèsta populara ganhada, al prètz d'un òme mòrt
 
Fraisse èra un jove estudiant tolosan de botanica, que foguèt tuat a 21 ans dins la nuèch del 25 al 26 d’octòbre de 2014, dins l’encastre de la repression d’una protèsta populara que comencèt d’un biais plan pacific contra la construccion d’una restanca dins la zòna umida del Testet, a Sivens (Galhaqués).
 
Al començament del mes de julhet, la justícia donèt rason als opausants de la restanca de Sivens. Foguèron anulladas la declaracion d’utilitat publica, l’autorizacion d’eissartatge e la derogacion sus las espècias protegidas. E mai l’estat foguèt condemnat a pagar 3750 èuros a las associacions. “Aurà calgut un mòrt per que tot s’arrèste”, çò diguèt Ben Lefetey, pòrtavotz del collectiu Testet.
 
Lo gendarma que lancèt la granada mortala sus Rémi Fraisse foguèt plaçat en març passat jos l’estatut de testimòni assistit. Foguèt entendut per de jutges de Tolosa dins l’encastre de l’informacion judiciària dobèrta per “violéncias volontàrias qu’an entraïnat la mòrt sens intencion de la donar”.
 
De fach, la mòrt de Rémi Fraisse portèt la crisi al govèrn francés. Las nombrosas susmautas qu’esclatèron per tot l’estat francés, en seguida de la mòrt de l’estudiant de botanica, portèron de problèmas al govèrn de la Republica.
 
Lo govèrn francés ensagèt de reglar la mòrt del jove tolosan en enebissent l’usatge de las granadas e en suspendent los trabalhs del barratge, mas un larg sector de la societat, los movements ecologistas e de partits d’esquèrra demandèron la demission del ministre Cazeneuve, que se limitèt a dire que i auriá “de sancions se s’es comés de fautas”. Las protèstas e las susmautas percorreguèron tot l’estat, la majoritat amb d’afrontaments violents entre manifestants e policièrs.


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Mèfi ! 31
5.

*instruir
Segond le TdF normalizat: instruire / instrúser
Instrusi, instruses, instrutz, instrusèm...

  • 0
  • 0
Mèfi ! 31
4.

Me demandi çò que preparan a Nòstra Douna de las Landas...
L'important es de voidar aquel monde comunitar de la zòna..
L'antianarquisme... Contra les que foncionan pas per entrepresas capitalistas interpausadas...

  • 2
  • 0
Joan Francés Blanc Estrasborg
3.

Après Vital Michalon, un autre jove occitan tuat per l'Estat francés, que contaròtla l'aparelh judiciara e garentís l'impunitat dels assassins.

  • 4
  • 1
Joan Francés Blanc Estrasborg
2.

Après Vital Michalon, un autre jove occitan tuat per l'Estat francés, que contaròtla l'aparelh judiciara e garentís l'impunitat dels assassins.

  • 3
  • 1
Joan Francés Blanc Estrasborg
1.

Après Vital Michalon, un autre jove occitan tuat per l'Estat francés, que contaròtla l'aparelh judiciara e garentís l'impunitat dels assassins.

  • 2
  • 1

Escriu un comentari sus aqueste article