Bandièra01 1180x150: Comuna de Tolosa

Actualitats

Las primièras eleccions sens ETA pòrtan lo Bascoat al sobeiranisme

Las eleccions al Parlament del Bascoat (“Euskadi”, comunautat autonòma basca) d’ièr son doblament istoricas. D’un costat, foguèron las primièras que se celebrèron dins un encastre de patz e amb totas las opcions politicas presentas en egalitat de condicions. Caliá, alavetz, analisar en detalh los resultats electorals perque s’agís de las primièras eleccions ont totes los partits se son poguts presentar amb normalitat e totes los ciutadans an pogut votar liurament, sens cap de condicionant. De l’autre costat, son istoricas perque se pòt pas dobtar del resultat: lo sobeiranisme basco s’impausèt d’un biais egemonic e daissèt los dos grands partits espanhòls, lo PSOE e lo PP, a la tresena e la quatrena posicion respectivament.
 
Lo Partit Nacionalista Basco (PNB), formacion istorica del nacionalisme basco, s’aucèt a la victòria incontestabla en capitar 27 dels 75 sètis que forman lo Parlament basco. En segond luòc demorèt EH Bildu, coalicion electorala de l’esquèrra abertzale (esquèrra patriotica), qu’atenguèt la chifra istorica de 21 deputats, un resultat que jamai aviá atengut dins cap de las siás marcas electoralas. Entre aquelas doas formacions politicas, doncas, se distribuís mai de la mitat de totes los sètis en jòc. En tresen luòc demorèron los socialistas, amb solament 16 deputats. Aquel resultat es mai que mai grèu en prenent en compte que lo lehendakari (president) sortent, Patxi López, es socialista. En quatrena posicion demorèt lo PP de Mariano Rajoy qu’atenguèt solament 10 sètis. Fin finala, un deputat foguèt elegit pel petit partit espanholista UPyD.
 
Lo scenari que se dobrís al Bascoat es, doncas, istoric. Lo nacionalisme moderat incarnat pel PNB recuperarà la presidéncia del govèrn basco e caldrà èsser atentius als possibles paches. Lo futur president, Iñigo Urkullu, a doas vias possiblas: reeditar los vièlhs paches amb los socialistas o cercar una entenduda amb EH Bildu per avançar sul camin sobeiranista. Lo PNB a pas dich encara qual dels dos camins explorarà, e de fach es possible qu’òpte per governar en solitari dins una primièra estapa. Pendent la campanha electorala, Urkullu faguèt un discors sobeiranista moderat, mas en la darrièra linha drecha anoncièt que la siá fuèlha de rota passava per Quebèc, Escòcia, Flandra e Catalonha, en mostrant clarament quala es la siá vision de l’avenir del Bascoat.
 
 
En Galícia
 
Ièr se fasiá tanben d’eleccions en Galícia. Dins aquela nacion istorica de l’Estat espanhòl, los resultats foguèron fòrça desparièrs. Lo PP, qu’aviá ja la presidéncia, tornèt ganhar amb comoditat e obtenguèt la majoritat absoluda amb 41 dels 75 sètis en jòc. Cal dire que Galícia es lo territòri natal de Mariano Rajoy, que s’afanèt dins la campanha e qu’aviá priorizat la zòna amb d’investiments. En segond luòc demorèron los socialistas, amb 18 sètis, en patissent una fòrta davalada. L’estonament de la nuèch foguèt l’emergéncia d’una nòva coalicion que capitèt la tresena posicion, menada per Xosé Manuel Beiras, un istoric del nacionalisme. La siá coalicion d’esquèrra e nacionalista obtenguèt 9 deputats, del temps que la quatrena posicion foguèt pel Blòc Nacionalista Galèc (BNG), qu’atenguèt 7 deputats. I a la circonstància que Beiras fondèt lo BNG, de sòrta que la division del nacionalisme galèc a supausat una division del sieu espaci electoral. 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pirolet
1.

E los insults contunhan. Fins ara èran los catalans que cascaban. Ara son los bascos que tenon drech a ésser comparats a Hitler per aver votar sobeiranista. Sustot vos arrestatz pas dònas e sénher jacobins: una picadura de rampèl nos ven a posita per mostrar als septics cal sètz en el fons.

  • 3
  • 0

Escriu un comentari sus aqueste article