Bandièra01 1180x150: Comuna de Tolosa

Actualitats

Tusk convida lo Reialme Unit a demorar dins l’UE

Lo messatge del president del Conselh Europèu sortiguèt qualques jorns après que Nigel Farage aguèt dobèrt la pòrta a far un segond referendum sul Brexit

Lo president del Conselh Europèu, Donald Tusk, a convidat un còp de mai lo Reialme Unit a quitar pas l’Union Europèa. “Aicí, sul continent, i a pas agut de cambiament d’opinion. Los nòstres còrs demòran dobèrts a vosautres”, çò diguèt Tusk dimars passat dins una sesilha plenària de l’Eurocambra a Estrasborg (Alsàcia).
 
“Se lo govèrn britanic manten sa decision de partir, lo Brexit serà una realitat —amb sas consequéncias negativas— en març de l’an que ven, franc que i aja un cambiament d’actitud dels amics britanics”, çò assegurèt lo polonés en far referéncia a la reünion que los caps europèus tenguèron en decembre passat e que pachèron lor autorizacion per passar a la segonda fasa de las negociacions del Brexit.
 
Dins sa clucada d’uèlh als britanics partisans del “Remain”, Tusk mençonèt David Davis, negociaire britanic pel Brexit. “Foguèt pas el que diguèt: «S’una democracia pòt pas cambiar d’opinion, quita d’èsser una democracia»?”, çò demandèt retoricament. Lo messatge de Tusk sortiguèt qualques jorns après que l’èx-cap de l’UKIP e un dels principals promotors de la sortida del Reialme Unit de l’Union Europèa, Nigel Farage, aguèt dobèrt la pòrta a far un segond referendum sul Brexit.
 
Los caps d’estat e de govèrn dels 27 estats membres de l’UE —levat del Reialme Unit— convenguèron lo 15 de decembre passat d’anar devèrs la segonda fasa de las negociacions del Brexit.
 
Ara, lo Reialme Unit e l’UE auràn d’abordar d’elements que pertòcan lors relacions futuras e tanben d’aspèctes de debatre coma lo comèrci o la seguretat. Dins son discors de dimars, Tusk afortiguèt tanben que caliá “mai de clartat” sus la vision del Reialme Unit per rapòrt a las relacions futuras amb l’UE un còp que s’oficializariá lo divòrci. “Lo trabalh mai complicat lo nos cal far encara e lo temps es sarrat”, çò ajustèt.
 
 




abonar los amics de Jornalet
 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
1.

Lo poble Britanic decidiguet per referendum, causa propia dels paisos democratics, sortir de l'Union Europea. E los governs de mercaders, de l'UE e los banquers privats que son una cola de laires, vesen perilhar sas robatorias a la classa metjana e trabalhadora .

  • 3
  • 0

Escriu un comentari sus aqueste article