Bandièra01 1180x150: Comuna de Tolosa

Actualitats

Erdoğan auriá ordenat personalament l'assassinat de tres politicianas curdas a París en genièr de 2013

Segon la confession de dos agents dels servicis secrets turcs (MİT) capturats pel PKK

En genièr de 2013 assassinèron tres politicianas curdas a París, qu'una d'elas èra fondadora del Partit dels Trabalhadors de Curdistan (PKK). Las tuèron d'un còp de fuòc al Centre d’Informacion de Curdistan. O raportàvem sus Jornalet. Ara, dos agents dels servicis d'intelligéncia turca (MİT) an confessat que lo govèrn turc aviá organizat aqueles assassinats, çò rapòrta Directa.
 
Los dos agents del MİT foguèron capturats en agost passat pel PKK dins l'encastre d'una operacion de contraespionatge. L'agéncia curda d'informacion ANF n'a publicat lor confession, e mai se l'estat turc n'a enebit la difusion.
 
Los agents del MİT èran anats en Curdistan per organizar la sequestracion e l'assassinat de qualques membres del PKK mas foguèron capturats. S'agís d'Erhan Pekçetin, director del Departament d'Activitats Separatistas Etnicas e Aydın Günel, director de ressorsas umanas.
 
Dins lors confessions, los dos agents del MİT parlan de biais natural davant la camèra de lors ròtles dins lo MİT e cossí foguèron capturats. Dison que se tròban dins una preson desconeguda d'un endrech desconegut e qu'an pas patit cap de maltractament.
 
Gràcias a la detencion d'aqueles dos agents, l'intelligéncia curda a pogut desactivar divèrsas cellulas del MİT en Rojava (lo Curdistan de l'estat sirian). Mas lor detencion a servit sustot per esclarir los assassinats de las tres politicianas curdas assassinadas a París en genièr de 2013. Segon aquelas declaracions, l'òrdre per executar aqueles assassinats foguèt donat personalament per Erdoğan, e l'executèt Hakan Fidan per mejan del MİT. Dison tanben qu'an mai d’informacion sus aquela operacion e que la partejaràn dins l’avenidor.
 
 
Persecucion de l'informacion en Turquia
 
De son costat, Turquia contunha sa politica de restriccion de la libertat d'informacion e  l’arrestacion de jornalistas. Se barra de jornals, s'enebís de sits web e las publicacions criticas amb lo govèrn patisson de pressions de tota mena.
 
Coma consequéncia de la resolucion numèro 3 de la Cort Penala de Patz d'Ankara, s'es enebit l'accès als darrièrs articles de l'ANF restacats a las confessions dels agents del MİT capturats dins l'operacion del PKK.





abonar los amics de Jornalet
 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
1.

Aqueste Erdogan es un criminal de la mai baissa calanha.

  • 3
  • 0

Escriu un comentari sus aqueste article