L’esqüat dich La Chapelle (La Capèla), a Tolosa, es intrat dins la legalitat. Çò qu’èra l’esqüat pus ancian d’Occitània es, dempuèi lo 19 de genièr passat, un centre cultural alternatiu legal après la signatura d’un acòrdi entre la comuna e l’associacion L’Atelier Idéal (L'Obrador Ideal) que gerís lo luòc dempuèi 25 ans.
 
Aquel acòrdi prevei un arrendament enfiteutic de 40 ans, assortit d’una promessa unilaterala de venda per un montant de 100 000 èuros e una durada de cinc ans. La comuna ditz qu’a fixat aquel prètz “en rason de l’interès general dins les domenis culturals e associatius e d'òbras necitas de realizar a La Chapelle per l’associacion”.
 
D'efièch, l’associacion L’Atelier Idéal deu far de trabalhs de mesa a las nòrmas obligatòrias per aculhir lo public. Dins aquel sens an bandit una soscripcion en linha per recoltar una partida dels fonzes necessaris. Per ara son amassats mai de 32 000 èuros. A tèrme, l’associacion compta de recrompar La Chapelle “per la sostraire definitivament a l’especulacion immobilièra”.
 
 
L’esqüat pus vielh d’Occitània
 
L’esqüat èra lo pus vièlh de Tolosa e d’Occitània tota. Los locals situats en Carrièra de Casanòva foguèron esquatats en 1993. En 2009, la comuna de Tolosa recrompèt lo sit per 200 000 èuros. En junh passat se tenguèt una deliberacion del conselh municipal qu’evòca “la conclusion d’un arrendament enfiteutic e la signatura d’una promessa de venda amb l’associacion L’Atelier Idéal”, çò rapòrta Actu.fr.