Bandièra01 1180x150: Comuna de Tolosa

Actualitats

crotz-tolosaCreated with Sketch.GasconhaVal d'Aran

Se presenta lo movement ciutadan Taula per Aran

Aquel collectiu de ciutadans araneses critican l'imatge d'espanholitat del país occitan balhat pels mèdias espanhòls e afirman que solament Catalonha reconeis l'autogovèrn e la singularitat d'Aran

Lo movement ciutadan que capitèt a menar a bon tèrme lo referendum d'independéncia del 1r d'octòbre passat en Aran es vengut un collectiu nomenat Taula per Aran. E mai s'aquel collectiu es actiu dempuèi qualques meses, ven de se presentar publicament amb un comunicat.
 
Taula per Aran se definís coma "un corròp de ciutadans de  diuèrses idèes politiques, transversau e dubèrt ara participacion des persones que viuen en Aran", es a dire un "grop transversau d’opinion que vò aufrir es airines entà recuperar e reforçar eth debat des aranesi" en çò que tanh al futur d'Aran. Dins aquel sens, creson qu'"Aran a de besonh qüestionar-se e recéber responsa sus eth futur de Catalonha qu’afècte indefectiblament eth futur d’Aran".
 
D'un latz, Taula per Aran planh lo messatge d'espanholitat d'Aran que transmeton los mèdias de l'estat espanhòl, puèi qu’aquestes presentan los araneses coma d'"irreductibles" en tot refusar "era melhor vertit qu'[an] es aranesi: era pluralitat". De l'autre, "non se pò obviar qu’ua part des aranesi volem èster damb es nòsti vesins catalans en procès democratic de decision deth nòste futur", çò afirman.
 
Ansin, son convencuts qu'Aran deu "contunhar eth sòn camin amassa damb eth pòble catalan",  car l'autogovèrn del pòble aranés "ei sonque reconeshut peth Parlament de Catalonha", en tot precisar qu’es solament Catalonha que reconeis la singularitat d'Aran, e que "non existís cap sòrta de reciprocitat damb er estat espanhòu".
 
Per tant, la còla de Taula per Aran creson qu'en cas que" Catalonha sigue ua naua realitat politica democratica dehòra der estat espanhòu, es aranesi [an] eth dret d’escuélher eth [son] futur, e aguest passe inequivòcament per arténher ena futura Republica de Catalonha e Aran".
 
Taula per Aran es un collectiu especific d'aquel país occitan, inspirat dels CDR de Catalonha, valent a dire los Comitats de Defensa del Referendum que puèi venguèron de Comitats de Defensa de la Republica
 
 
 
 
fffff fffff
 COMUNICAT DE TAULA PER ARAN
 
Ancianament, sustot es dies de mau temps en iuèrn, es vesins des pòbles aranesi conversauen ath torn deth huèc, e es convèrses virauen ath torn dera vida e tanben dera politica. Aué en dia, aguesti espacis de debat e de confrontacion d’idèes s’an trasladat as carrèrs e d’auti espacis qu’era ciutadania aranesa auem guanhat democraticament.  Atau, darrèrament, auem vist preocupadi com era abséncia de debat se hège horat ena  Val d’Aran. Auem vist com se volie impausar ua vision e ua linha de pensament unica, balhant  un messatge inequivòc d’espanholitat enes televisions e mejans de comunicacion estataus, coma se siguéssem irreductibles, negant era milhor virtut qu’auem es aranesi: era pluralitat.
 
Per tot aquerò, auem decidit de crear TAULA PER ARAN. Era taula ei un grop transversau d’opinion que vò aufrir es airines entà recuperar e reforçar eth debat des aranesi en relacion ath nòste futur. Sense estridéncies, sense falses vertats. Aran a de besonh  qüestionar-se e recéber responsa sus eth futur de Catalonha qu’afècte indefectiblament eth futur d’Aran. Èm un corròp de ciutadans de diuèrses idèes politiques, transversau e dubèrt ena participacion d’aquères persones que vieuen en Aran e que s’an guanhat eth dret a participar en aguest debat. Non èm d’acòrd damb eth missatge de qu’aquerò non va damb nosati. Eth futur d’Aran va damb toti nosati.
 
Eth pòble aranés a eth dret de decidir eth sòn futur e autogovèrn . Aran ei ua realitat politica e sociau diferenta ara Catalana, mès non volem amagar que credem qu’Aran a de contunhar eth sòn camin amassa damb eth poble Catalan. Era societat aranesa ei fòrça mès diuèrsa e plurau de çò que bèri uns mos an insistit en hèr-mos a creir. Non se pò obviar qu’ua part des aranesi volem èster damb es nòsti vesins catalans en eth procés democratic de desicion deth nòste futur.
 
Aqueri que volen transméter eth missatge qu’eth Pòble Aranés a ua volontat inequivòca d’union damb Espanha e da suport sense palliatius ath regim deth 78, vòlen ocultar e silenciar era opinion d’ua part dera societat aranesa. Credem qu’existís un distanciament entre bèra classa politica aranesa e era realitat plurau dera gent que trabalhe e viu en nòste país.
 
Era Val d’Aran gaudís en aguesti moments dera maxima quòta d’autogovèrn qu’a auut jamès ena sua istòria modèrna e credem qu’aguesta s’a de consolidar e aumentar, sustot ena vessant economica. Mès non auem de desbrembar qu’aguest autogovèrn que ges deth poble aranés, ei sonque reconeshut peth Parlament de Catalonha. E qu’es competéncies  qu’a transferides eth Conselh Generau d’Aran provien de Catalonha, qu’ara fin, ei er unic estament que mos reconeish era nòsta singularitat, tant en sòn Estatut actuau coma ena Lei d’Aran aprovada en 2015. Aué en dia, non existís cap de sòrta de reciprocitat damb er Estat Espanhòu, ne cap de transferéncia recebuda pera part d’aguesti.
 
Mos còste d’imaginar qu’er Estat Espanhòu mos facilite un tracte diferenciau en un futur, que respècte era nòsta cultura, era escòla aranesa, eth nòste miei ambient, pr’amor que per toti ei coneguda era politica de mensprètz der Estat Espanhòu tara diuersitat culturau e política, eth mensprètz tàs nacions qu’aué en dia formen er Estat Espanhòu.
 
Per tot aquerò, credem fermament qu’Aran a d’èster amassa damb eth pòble de Catalonha ena luta pes sues legitimes aspiracions. E, en cas que Catalonha sigue ua naua realitat politica democratica dehòra der Estat Espanhòu, es aranesi auem eth dret d’escuélher eth nòste futur, e aguest passe inequivòcament per arténher ena futura Republica de Catalonha e Aran
 
Val d’Aran, noveme de 2017.
 
   



abonar los amics de Jornalet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
2.

Urrà Aran !
Urrà la Taula per Aran !
E Urrà pels araneses !

  • 7
  • 0
Ròdrigo Bigòrra
1.

Adixatz , hèra importanta aquera manifestacion que deven estar aumens cinquanta a tot copar !

  • 0
  • 16

Escriu un comentari sus aqueste article