Bandièra01 capçalera  1180x150: Botiga

Actualitats

crotz-tolosaCreated with Sketch.GasconhaVal d'Aran

Renauida era collaboracion dera Deputacion de Lhèida damb eth Conselh Generau d'Aran

Se manten era subvencion de 220 000 euros ath Govèrn d'Aran entà occitan, torisme, promocion economica e cultura

Eth president dera Deputacion de Lhèida, Joan Reñé, e eth Sindic d’Aran, Carlos Barrera, qu'an signat aguest dijaus 12 d'abriu ua convencion entàs ans 2012 e 2013 que renauís era collaboracion institucionau
Eth president dera Deputacion de Lhèida, Joan Reñé, e eth Sindic d’Aran, Carlos Barrera, qu'an signat aguest dijaus 12 d'abriu ua convencion entàs ans 2012 e 2013 que renauís era collaboracion institucionau

Tèxte legit

Eth president dera Deputacion de Lhèida, Joan Reñé, e eth Sindic d’Aran, Carlos Barrera, qu'an signat aguest dijaus 12 d'abriu ua convencion entàs ans 2012 e 2013 que renauís era collaboracion institucionau.


Era Deputacion de Lhèida que balharà ath Conselh Generau d'Aran 220 000 èuros tar an 2012, entath sosten der occitan, deth torisme, dera promocion economica, e dera restauracion der auviatge arquitectonic e bens culturaus. Era convencion qu'establís tanben, qu'a compdar de 2013, aguesta quantitat s’actualizarà en moment dera aprobacion annau deth pressupòst dera corporacion.
 

Eth president dera Deputacion de Lhèida qu'a manifestat era sua satisfaccion pera signatura d’aguesta convencion e eth compromís “dera corporacion entà contunhar era collaboracion eth tot çò que sigue de besonh ath delà des concèptes establidi en document”. 
 

Deth sòn costat, eth Sindic d’Aran a arregraït era “predisposicion e fidelitat institucionau” que mantien eth Conselh Generau d’Aran e era Deputacion de Lhèida. Barrera qu'a avalorat eth hèt que se mantengue era madeisha quantitat economica qu'er an passat en tot tier en compde era complèxa situacion economica.

 

Aquera signatura qu'ei era seguida de dues convencions marc signades entre era Deputacion de Lhèida e eth Conselh Generau d'Aran en hereuèr de 2005 e de deseme de 2009 que regulauen era collaboracion entre es ans 2005 e 2008, e entre es ans 2009 e 2011. 
 

Damb era signatura dera convencion se met en evidéncia era volontat de collaboracion entre era Deputacion de Lhèida e eth Conselh Generau d’Aran, entà fixar es linhes generaus de collaboracion en cada encastre competenciau quan serà possible e se considerarà convenent.
 
Er acte qu'a compdat damb era preséncia deth conselhèr d’Agricultura, Ramaderia e Miei Naturau deth Conselh Generau d'Aran, José Enrique Arró, e eth vice-president tresau dera Deputacion de Lhèida, er aranés Pau Perdices.


Conselh Generau d'Aran / Ferriòl Macip

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article