Bandièra01 1180x150: Comuna de Tolosa

Actualitats

Catalonha: es reportada la sesilha d’investidura de Carles Puigdemont

Lo president del Parlament o decidiguèt per garentir “totes los dreches” del president de la Generalitat que se tròba en exili e que son investidura l’estat espanhòl vòl “empedir per totes los mejans”

| ANC
Catalonha visquèt ièr una jornada de tensions politicas e ciutadanas après que lo president del Parlament de Catalonha, Roger Torrent, aguèt anonciat de matin que reportava a pus tard la sesilha d’investidura de Carles Puigdemont coma president de la Generalitat, prevista per aquel meteis jorn a 15h del tantòst.
 
Torrent o decidiguèt per garentir “totes los dreches” de Puigdemont que se tròba en l’exili e que son investidura l’estat espanhòl vòl “empedir per totes los mejans”.
 
 
Jornada de tensions politicas e ciutadanas
 
Lo govèrn espanhòl, e lo blòc espanholista del Parlament, celebrèron la decision. Aquestes ensajan d’empedir a quin prètz que siá l’investidura de Puigdemont, fins al ponch d’organizar de contraròtles exaustius a las frontièras per empachar l’intrada al país del president catalan, de recèrcas dins los doats del Parlament, e quitament de menaças dirèctas contra Roger Torrent e a sos enfants.
 
Per contra, lo blòc independentista es devesit. D’un latz, Esquèrra Republicana de Catalonha (ÈRC) saludava la decision de Torrent en cresent que s’agissiá d’un bon còp politic car ara la palma es dins lo camp del Tribunal Constitucional, qu’a decidit d’enebir una investidura a distància. Mas de l’autre costat, Junts per Catalunya (JxCat, Amassa per Catalonha) e la CUP mostrèron lor malcontentament e quitament anèron al Parlament. Planhon d’èsser pas estats consultats per Torrent, de s’èsser assabentats de sas decisions pels mèdias e considèran qu’es una concession a l’estat espanhòl, puèi que lo parlament aviá totas las condicions democraticas per elegir Puigdemont.
 
Cossí que siá, en reportant la sesilha, Torrent a evitat la menaça d’èsser menat en justícia pel ministèri public.
 
 
Manifestacion davant lo parlament
 
Mentretant, l’Assemblada Nacionala Catalana decidiguèt de manténer la manifestacion convocada e declarèt qu’acceptariá pas un sol “pas endarrièr”. Dins aquel sens, l’ANC diguèt net e clar: “Acceptarem pas qu’un tribunal dicte las decisions del Parlament” en tot “exigir que se respècte lo mandat popular obtengut de las urnas lo 21 de decembre”.
 
La manifestacion venguèt de mai en mai granda e arribèt d’intrar dins lo pargue de la Ciutadella, ont se tròba l’edifici del Parlament, qu’aviá las pòrtas barradas. E mai l’ANC aguèsse desconvocada la protèsta e demandat d’evitar tota mòstra de violéncia, la molonada capitèt a rompre las barraduras e trespassèt los cordons de la polícia. Fin finala, los policièrs se repleguèron en se limitant a protegir la bastissa del Parlament.
 
Fòrça manifestants portavan de mascas amb la cara de Puigdemont e de bandeiròlas que revendicavan la libertat dels presonièrs politics, per la republica, contra la repression, per la libertat e per que s’oblidèsse pas la jornada del 1r d’octòbre passat. Tanben se brandava de bandièras independentistas e de ribans jaunes que revendicavan la libertat dels presonièrs.
 
Qualques manifestants an passat la nuèch davant lo parlament.
 
 
Puigdemont s’adreiça al país
 
Quant a el, Carles Puigdemont, faguèt de ser una compareissença mejançant un vidèo difusat suls rets socials e TV3. Lo president de la Generalitat apelèt a la resisténcia e a l’unitat de las fòrças independentistas. “Çò que nos a menat fins aicí es l’unitat. La perdam pas. Es çò que pantaissan los que nos vòlon en preson e en exili pendent fòrça ans”, çò diguèt del temps que planhiá, mas respectava, la decision de Torrent, de reportar la sesilha d’investidura.
 
E mai, Puigdemont afortiguèt que l’accion del govèrn espanhòl per empedir son investidura èra un “cantatge”, e cridèt a defendre la sobeiranetat del Parlament de Catalonha contra las ingeréncias del Tribunal Constitucional espanhòl.
 
Enfin, acusèt la justícia espanhòla d’èsser al servici del govèrn espanhòl e cridèt a la resisténcia davant un estat espanhòl “fòrt e poderós” que sembla d’aver la permission de jogar lord. “Catalonha s’es pas renduda”, çò diguèt en tot reconéisser que “la judicializacion de la politica catalana aviá alentit [lor] progrès collectiu”.

     
 



abonar los amics de Jornalet

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Piulet
6.

Una oportunitat extraordinària per lo Sr Puigdemont per fondar la fritariá belga Chez Charlot (maison Puigdemont) que se farà celèbra a partir de las annadas 2025.

  • 1
  • 3
Mèfi ! 31
5.

Le Tribunal constitucional e le govèrn son una causa, mès s'o permetten amb le sosten de l'opinion espanhòla, que l'appròba la constitucion e mai son interpretacion sens fondament e contrària al dreit internacional. Dejotz aquò, i a un formatatge politic de l'opinion e un anticatalanisme irracional.

  • 4
  • 0
francesc palma
4.

Lo President Puigdemont se 's que vol ser nomenat president, ha de ser realista e parlar pas pus de que encara es posssible lo somni, de que vol dialogar per acabar disen que lo que vol es negociar la celebracion del referendum d'autodeterminacion, e ha de parlar pas per ara de la Republica Catalana. Ha de voler dialogar dins la constitucion, ha de donar unas garantias al govern pp, que com se sap son laires e pas democratas, e aplican lo 155 e fan la justicia a la seva manera. Dialogar s'ha de dialogar, de la Nacion Catalana, de lo concert economic, de lo blindatge de la lenga e la cultur, de las seleccions esportivas, de recuperar la Genralitat e que surtin los presos politics. Tantas causas per far, que lo blocatge actual impedeis.

  • 0
  • 1
Pirolet
3.

Per completar 1 e 2 e en parafrasant lo paure* Ovidi Montllor, valencian, cantaire e artista de tria:

I a de mond qu'aiman pas que se parle, s'escriga o se pense en occitan. Son los meteisses qu'aiman pas que se parle, s'escriga o se pense.

Ai remplaçat "catalan" per "occitan". I podètz botar "còrs", "breton", "alsacian"...

*Defuntat en 1995

  • 5
  • 0
Reinat TOSCANO LO VAU
2.

#1 "Pas gaire mai relusent"? Non: pièger!
Quàuqueis exemples:
- L'armada à Aleria
- Lei recentei declaracions còntra Corsega ("Volèm ben prendre en còmpte l'ecpcion còrsa, mai sensa faire de diferéncia amé leis autrei regions").
- Lei declaracions de Valls, per dire qu'en plaça de Belgica, aurié liurat lo President Puigdemont, en despièch de l'abséncia d'un mandat d'arrèst europeu!

etc., etc.

Lo "país dei drechs de l'òme"? Me sovèni que, per far mon servici militari, fuguèri afectat dins un regiment classat "semidisciplinari", perqué aviéu seguit de cors d'occitan au Liceu, anavi à d'espectacles occitans e en Facultat e frequentavi d'occitanistas!

  • 7
  • 0

Escriu un comentari sus aqueste article