Almens dètz e sèt personas mòrtas e quinze nafradas es lo tragic bilanç d’una fusilhada que se debanèt ièr de matin a l’interior d’un licèu en Florida (Estats Units). Lo responsable del masèl seriá un gojat de 19 ans sonat Nikolas Cruz, de 19 ans, que se liurèt a la polícia après cometre lo chaple.
 
La fusilhada aguèt luòc just après qu’aguèron acabat los corses al licèu Marjowy Stoneman Douglas a Parkland, una vila situada al nòrd-oèst de Fort Lauderdale, aperaquí a 80 quilomètres de Miami. Demest los mòrts, dotze foguèron tuats dins lo licèu, dos defòra, un per carrièras e la rèsta dins l’espital, segon çò que raportava la cadena Fox News.
 
Segon çò qu’explicava lo sherif del comtat de Broward, lo presumit assassin portava un fusilh d’assaut AR-15 e divèrses cargadors e èra estat fòrabandit del licèu per de rasons disciplinàrias.