Bandièra01 1180x150: Comuna de Tolosa

Actualitats

Eslovaquia: an assassinat un jornalista qu’enquestava sus d’afars de corrupcion

Los jornalistas eslovacs reclaman al govèrn que se meta l’afar en examen e se crèe las condicions per trabalhar amb seguretat

Lo jornalista eslovac Ján Kuciak, de 27 ans, e sa calinhaira foguèron trobats mòrts diluns passat dins lor lotjament a Velka Maca, a 50 km de Bratislava. Kuciak èra conegut per sas recèrcas sus la corrupcion publicadas dins lo jornal en linha aktuality.sk. Segon la polícia, lo crime se seriá passat entre dijòus e dimenge passats.
 
Reportaires sens Frontièras (RSF) s’es declarat “en estat de chòc” e a condemnat l’assassinat. Tanben o a fach l’Organizacion per la Seguretat e la Cooperacion en Euròpa (OSCE). Quant a la societat Axel Springer, que publica aktuality.sk, a condemnat aquel “crusèl assassinat”.
 
Catòrze caps-redactors de publicacions eslovacas an sortit un comunicat que reclama al govèrn que se meta l’afar en examen e se crèe las condicions per que los jornalistas pòscan trabalhar amb seguretat.
 
 
La corrupcion
 
Es fòrça probable que lo murtre siá ligat al trabalh de recèrca del jornalista, que fasiá d’enquèstas suls delictes fiscals de l’entrepreneire Marian Kocner.
 
Dins lo darrièr article publicat pel paure Kuciak, Marian Kocner seriá restacat a divèrses faches de frauda fiscala e als transferiments pauc transparents de proprietats dins lo projècte immobilièr Five Star Residence de Bratislava, ont seriá tanben implicat l’entrepreneire Ladislav Basternak. De soslinhar que l’afar Basternak causèt fòrça protèstas multitudinàrias dins aquel país, ont los manifestants acusavan los governants de manca de volontat per combatre la corrupcion.
 
 
De jornalistas portats desapareguts
 
Segon qualques mèdias locals, Kocner aviá menaçat Kuciak, e aqueste o raportèt puèi a la polícia, e mai se lo president de la polícia, Tibor Gaspar, ara se mòstra discret. Per Gaspar s’agís d’una “ataca sens precedents contra un jornalista, quicòm que s’èra pas jamai passat abans en Eslovaquia”. Ça que la, fa dètz ans que lo jornalista Pavol Rypal es portat desaparegut, après qu’el documentèt lo biais operacional de la màfia del país. Tanben desapareguèt en 2015 lo jornalista Miroslav Pejko, reportaire del jornal Hospodárske noviny.
 
 
De connexions amb Malta
 
Marian Kocner, l’òme d’afars sul qual Ján Kuciak enquestava, auriá de ligams amb Malta. Lo jornal Malta Today publiquèt en abril de 2012 que Kocner èra “un entrepreneire eslovac restacat a la màfia”.
 
En octòbre passat èra assassinada a Malta la jornalista Daphne Caruana-Galizia, fòrça coneguda per aver publicadas d’informacions que desvelavan de famoses cases de corrupcion del país en relacion amb de membres del govèrn.
 

 

 


 


abonar los amics de Jornalet
 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pirolet
2.

Al mens i a quicòm que progrèssa: es la mafiaizacion del mond.

  • 6
  • 0
francesc palma
1.

La mafia actua per comanda o encarrec, per assassinar a una persona que, gent empresarial poderosa sens escrupols comanda los crims a la màfia per eles non daissar pista a la policia. Per exemple: per assassinar als Kennedy e Marilyn, fogueron uns crims de la cia, mas executats per la mafia.

  • 2
  • 0

Escriu un comentari sus aqueste article