Bandièra01 1180x150: Comuna de Tolosa

Actualitats

Selmayrgate: escàndol dins la Comission Europèa

L’eleccion de Martin Selmayr coma secretari general de la CE a portat un escàndol a Brussèlas que poiriá menar a la fin del mandat de Juncker

L’eleccion de Martin Selmayr coma secretari general de la Comission Europèa (CE) a portat un escàndol a Brussèlas, a causa dels procediments de l’eleccion. Selmayr foguèt lo cap del cabinet del president de la CE, Jean-Claude Juncker, fins al 21 de febrièr, quand foguèt promogut d’un biais fòrça escur.
 
N’a desvelat l’escàndol lo jornalista de Libération, Jean Quatremer, qu’a denonciat d’irregularitats en respectant pas los procediments de concorréncia e transparéncia per que d’autres foncionaris poguèsson postular. Delà son blòg dins lo jornal francés, Quatremer a publicat tanben un article en anglés dins The Spectator, ont explica quitament que Juncker es las e que Selmayr es ja de facto lo president de la CE, en tot manipular Juncker coma “una marioneta”.
 
 
Vilaweb tanben denóncia l’afar. Lo jornal catalan explica que quatre politicians europèus an agit amb coordenacion e a l’esconduda de la rèsta de comissaris per lor benefici pròpri. S’agís de Jean-Claude Juncker, Martin Selmayr, l’espanhòla Clara Martínez Aberola (principala figura de proa contra l’independentisme catalan dins la CE) e Margaritis Schinas.
 
La demission de l'actual secretari general, Alexander Italianer, s'anoncièt en febrièr passat. Selmayr, que o sabiá dempuèi longtemps, aviá sollicitat lo pòst de vicesecretari e i aviá reüssit, car lo sol concurrent s'èra retirat de la competicion. Aquí aviá mai de possibilitats d'accedir al pòst de secretari general. Ara, li caliá aver un candidat alternatiu que foguèsse una femna. E i aguèt efectivament una autra candidata, que renoncièt al cap d’uèch minutas, l’espanhòla Martínez Alberola.
 
 
Criticas de la CDU, e la fin de Juncker
 
Lo jornalista Hughes Beaudouin explicava sus Twitter que la CDU de Merkel aviá pas res a veire amb aquela nominacion, e que n’èra quitament pas favorabla. Segon Beaudouin, un eurodeputat CDU li diguèt net e clar: “Es pas Alemanha qu’a demandat la nominacion de Selmayr, nosautres volèm pas de gents sens experiéncia. Aquò es un còp d’estat”.
 
De son costat, lo cap dels liberals, Guy Verhofstadt, preditz la fin de la Comission Juncker. “Se la Comission Juncker fa pas atencion, aurà lo meteis sòrt que la comission Santer”, çò assegurèt en fasent referéncia a la comission dirigida pel luxemburgués Jacques Santer que deguèt demissionar en 1999 per una marrida gestion.
 

 
 

 
Lo ròtle vergonhant de Schinas
 
Quand se destapèt l’escàndol, entrèt en accion la figura del pòrtavotz en cap de la Comission, lo grèc Margaritis Schinas.  El ensagèt de protegir sos collègas en luòc de respondre a las questions que li pausavan los jornalistas.  Schinas temptèt d’esquivar l’escàndol, en disent que s’èra respectat totes los procediments legals “de manièra religiosa” dins la designacion de Selmayr coma secretari general. Davant la marrida umor e l’exasperacion d’Schinas, lo jornalista Quatremer li diguèt net e clar:  “Aquelas institucions vos apertenon pas a vos, mas als ciutadans europèus, e avèm tot lo drech de vos pausar de questions, e de vos repetir tantes còps coma voldrem, sens que vos calga nos donar de leiçons de moralitat”. Dins lo vidèo que seguís podètz veire la conferéncia de premsa.
 

 
 




abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pirolet
2.

I a quicòm de poirit dins lo reiaume de Junker e pudis cada còp mai. Cal veire cossi mercandèjan per nomenar cèrts comissaris.

  • 1
  • 0
Pirolet
1.

I a quicòm de poirit dins lo reiaume de Junker e pudis cada còp mai.

  • 0
  • 0

Escriu un comentari sus aqueste article