Bandièra01 1180x150: Comuna de Tolosa

Actualitats

crotz-tolosaCreated with Sketch.ProvençaProvençaTolonenc

De tragèdias dins l’èst d’Occitània a causa dels auratges fòrts

Dos estudiants mòrts a l’Universitat del Sud-Tolon-Var, de desapareguts, una escòla tocada al Toronet entre d’autres incidents grèus

Locanal pluvial que travèrsa l’Universitat del Sud Tolon-Var a La Garda
Locanal pluvial que travèrsa l’Universitat del Sud Tolon-Var a La Garda | Captura d'ecran de BFM TV
Dos estudiants foguèron emportats per la brusca pojada de las aigas del canal pluvial que travèrsa l’Universitat del Sud-Tolon-Var, a La Garda (Tolonenc). S’agís d’un gojat e d’una gojata de 20 ans.
 
L’accident se debanèt divendres passat, a 15h45, quand una estudianta resquilhèt e casèt dins lo canal conflat per las aigas de la pluèja. Tres jovents volguèron donar secors a la joventa sens succès. D’aqueles tres, sonque dos poguèron remontar a la superfícia. La jove estudianta e son camarada foguèron aspirats dins la part sosterranha d’aquel canal, que fa 800 mètres de long abans de tornar sortir e de se traire a la mar.
 
Lo còrs de la gojata foguèt trobat qualques oras puèi, a 19h20, blocada dins la canalizacion pel sac que portava a l’esquina. Lo còrs del gojat foguèt trobat l’endeman a l’entorn de 9h30.
 
Una cellula de sosten psicologic foguèt creada sus plaça pel servici departamental d’incendis e secorses, que s’engatja a explorar totas las canalizacions amb de camèras de vidèo.
 
 
Decorat a títol postum
 
L’estudiant mòrt per aver ensajat de donar secors a sa camarada, es estat decorat a títol postum, segon çò qu’anoncièt dissabte lo ministre francés de l’Interior, Manuel Valls.
 
“Per rendre omenatge a l’abnegacion, al civisme e a l’altruisme d’aquel que s’es portat al secors de la primièra victima e qu’e mai es mòrt, Manuel Valls, en acòrdi amb Geneviève Fioraso, ministra de l’Ensenhament Superior e de la Recèrca, a decidit de decernir, a títol postum, la medalha d’aur dels actes de coratge e de devocion a l’autor d’aquel gèst exemplar de solidaritat umana”, çò anoncièt lo ministèri dins un comunicat.
 
 
Un enfant desaparegut a Porcairòlas
 
Al delà, en l’illa de Porcairòlas, un enfant qu’èra en vacanças amb sos parents foguèt emportat pel vent fòrt quand anava en bicicleta, dissabte d’aprèsdinnar. Dimenge trobèron la bicicleta.
 
En fach, Brinholenc, Draguinhanenc, las Mauras e Tolonenc son estats plaçats en alèrta irange per Météo France fins a ièr, a 22h00, a causa dels risques ligats als vents fòrts.
 
 
Una escòla tocada al Toronet
 
Al Toronet (Draguinhanenc), una escòla foguèt ocupada per las aigas d’un riu conflat per las pluèjas diluvianas. Jos la pression, la paret de l’escòla s’esfondrèt. Aürosament los mainatges avián quitat l’establiment un pauc mai d’ora. “A qualques minutas près, s’es escapat a un drama, a una catastròfa”, çò declarèt una conselhièra municipala. Dins aquela vila, la fanga deteriorèt qualques veituras e 26 pabalhons.
 
 
D’autres incidents
 
D’autres incidents ligats als tempèris se produsiguèron en Occitània. Un jove de 26 ans que practicava lo windsurf desapareguèt a Serinhan (Besierés); un vaissèl fèrri de la societat SNCM trenquèt sas amarras pendent la nuèch entre dissabte e dimenge dins lo pòrt de Marselha. 23 000 abitacions foguèron privadas d’electricitat en Valentinés, Vercòrs, Diés, Botèiras, Naut Vivarés e Bas Vivarés, a causa dels vents qu’avián provocat de casudas d’arbres e de brancas sus las linhas. 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article