Bandièra01 1180x150: Comuna de Tolosa

Actualitats

Tolosa: l'Universitat Tolosa II Joan-Jaurés es al còr de la luta sociala

Las protèstas dels estudiants e del personal an reüssit contra la fusion de las universitats tolosanas

| IAATA
Es tombada la nòva: i aurà pas cap de fusion entre las universitats tolosanas. Aquela del Miralh, ara Joan-Jaurés, es mobilizada dempuèi tres meses contra un projècte per unir las universitats de Tolosa II (lo Miralh), Tolosa III (sciéncias), e las escòlas d’engenhaires INSA e INP.
 
Pels ensenhaires, aquela fusion permetriá, non solament una melhora visibilitat dins los classaments internacionals mas tamben lo pagament dels finançaments de l’IDÈX (Iniciativa d’Excelléncia) d’una valor de 25 milions d’èuros.
 
Ça que la, per los autres, es la possibilitat d’una aumentacion dels dreits d’inscripcion e la desparicion de matèrias mens rendablas segon los capitalistas.
 
D’en primièr, Daniel Lacroix, lo president de l’Universitat Joan-Jaurés voliá pas aquela fusion mas ne venguèt un acarnassit defensor. Aquela revirada precipitèt la mobilizacion dels estudiants e tanben del personal de Tolosa II. Mentretant, lo govèrn francés presentèt la nòva lei d’orientacion pels estudiants (Parcoursup) que dobrís la pòrta a una seleccion a la dintrada de l’universitat.
 
Tot aquel bolegadís a accelerat l'abandon del projècte per la ministra francesa de l'ensenhament superior, Frédérique Vidal, qu'a tanben decidit d’un còp la demission de totes los conselhs de l’Universitat Tolosa II, Daniel Lacroix d’en primièr, per nomenar un administrator provisòri, Richard Laganier qu’a pas volgut demandar l’intervencion de la polícia per lo desblocatge dels locals.
 
Per ara, la situacion es totjorn al punt mort mas aquela mobilizacion nos a aprés que, de còps, la luta pot abotir contra lo poder de l’argent.
 
Per ne saber mai, podètz legir d'articles sus aqueste afar sus Bastamag.net e sus IAATA.info.
 
 
 
Hierro Setiembre
 
 


abonar los amics de Jornalet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
3.

Enganan a la gent per far creire que lo que fa lo govern es lo melhor,mas ben segur qu' es lo contrari, lo que fa lo govern de dretas es lo piegre.

  • 2
  • 0
Enric Mala Tèsta
2.

Tarrible en fèit de véder lo retard ideologic d'aqueths joens que's pensan encoèra 50 ans a... ? E tu, qu'acceptas lo capitalisme coma una fatalitat, de quand datas ? Del melhor dels monds, d'A. Huxley, o de 1984, de G. Orwell ?

  • 6
  • 0
Pierre-Gabriel-François-Xavier
1.

Que son "contra la seleccion ?" Mes hòu, lo monde qu'ei "seleccion" ! E la fac ua via de garatge, per arrepréner ua espression francesa. Alavetz, qué, privilegiar un estudiant motivat en ua seccion on trobarà un emplec au 700au colhonàs en socio o istòria de l'art (qu'ac poish díser, que n'estoi tanben...), es tarrible aquò ? La seleccion a l'entrada de la facultat que virarà gents qu'i van per defaut com la seguida d'ua scolaritat tota traçada e que's puiràn enfin pausar las vertadèras questions : m'i soi mauescadut, perqué, çò qui voi har en la vita e com ?

Que's pausan totun en petits borgés aqueths estudiants, com tot s'avè a estar a gràtis... Òc, ua universitat que còsta hòrt de moneda, qu'i a economias a har, que la cau gerar. "Segon los capitalistes" ? Era obligat de díser aquò, de'ns har lo coplet "que soi maoïste" ? Parièr, lo "monde" qu'es capitaliste, pas que disi qu'es plan : la societat qu'es atau, qu'es bastida sus un sistème capitaliste. Tarrible en fèit de véder lo retard ideologic d'aqueths joens que's pensan encoèra 50 ans a...

Haussa deus drets, qu'an dit que non, qu'èra completament fauç. Après, qu'es paraula contra paraula. Enfin, dinc aquí, la facultat qu'es tostemps blocada quan "ganhèn" las soas arrevendicacions. Perqué ? A vista de nas, entà har mumusa au revolucionari. E susquetot tèner dinc au mes de mai entà poder har lo pegòt deu encoèra mei revolucionari en hestejant los 50 ans de mai 68. quan veden on ns'a miat...
Qu'an dejà començat a sacamandejar la soa universitat, arrenovelida a gran còps d'euròs i a belèu pas 2 ans. Aquò tabé qu'es capitaliste. Despensar e goastar...

  • 3
  • 9

Escriu un comentari sus aqueste article