Bandièra01 1180x150: Comuna de Tolosa

Actualitats

Brasil: la nòva sèria de Netflix descadena una fòrta polemica

La sèrie facha pel realizaire de Narcos, sembla de presentar l’istòria de l’afar Lava Jato segon lo vejaire de la drecha qu’a pres lo poder al país

La nòva sèria de Netflix O Mecanismo (Lo mecanisme) a portat la polemica en Brasil. Creada per José Padilha —autor de la coneguda Narcos— la sèria es basada sus l’afar Lava Jato, suls cases de corrupcion e sus la destitucion del govèrn d’esquèrra per mejan d’un discutit procès contra los presidents esquerristas Lula da Silva e Dilma Rousseff, amb la mesa al poder d’un govèrn de drecha dirigit pel president Michel Temer que privatizèt las ressorsas publicas.
 
La sèria sembla de presentar l’istòria segon lo vejaire de Temer, e mai aquò se dissimule en cambiant los noms dels personatges: Janete Ruscov en luòc de Dilma Rousseff o Samuel Thames en luòc de Michel Temer.
 
Tre lo començament s’anoncièt una campanha suls rets socials per suspendre l’abonament a Netflix, e ara quitament Lula e Roussef an denonciat publicament que la sèrie mòstra “un vejaire deformat sus l’istòria, amb de tons tipics del faissisme latent dins lo país”. Silva a anonciat que ne denonciariá los responsables.
 
Amb las etiquetas #CancelaNetflix e #BoicoteNetflix, se son difusats sul ret de messatges qu’acusan la sèria de manipular massissament. Un dels faches mai criticats es que lo personatge que representa Lula da Silva ditz l’expression “estancar a sangria”, es a dire “arrestar la sagnada”, que l’èx-ministre Romero Jucá prononcièt dins la vida reala quand suggerissiá un pache per arrestar l’afar Lava Jato en ordissent un còp d’estat contra Dilma Rousseff.
 
La setmana passada, Rousseff, que foguèt destituida pel Senat en 2015, escriguèt sus Facebook un messatge energic contra lo realizaire de la sèria, José Padilha. Ditz que la sèria reprodutz pas de “fake news” o de nòvas falsas, mas que lo quite Padilha “es vengut un creator de nòvas falsas”. “Lo cineasta fa pas servir la libertat artistica per recrear un episòdi de l’istòria nacionala. Mentís, falsifica e engana. Aquò es quicòm mai que de malonestetat intellectuala. Es quicòm pròpri d’un coard al servici d’una version que cranh la vertat”, çò ditz.
 
Quant a el, José Padilha assegurèt que la polemica a prepaus de la frasa de Jucà atribuida a Lula Da Silva èra nècia, en disent que “qui sap legir” es capable de separar la realitat de la ficcion.
 

 
 




abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
3.

La dreta brasilera es mala novelista, far una serie de Tv per enganar a la gent fent creire que los laires de las reçorcas publicas son los bons, e lo govern d'esquerra qu'ajudava a la classa trabalhadora son los dolents, es mal de creire. Una porqueria de novel·la.

  • 2
  • 0
Pirolet
2.

La desinformacion es en marcha d'en pertot per totes los mejans. En America latina los atacs contra los govèrnaments d'esquèrra contunhan ara, en luòc d'amb las armas, per las fake news de l'ultraliberalisme qu'a totes los mejans de comunicacion jos contraròtle. I a mens de mòrts que del temps de Rios Montt, Pinochet e Videla, mas n'i a encara e se veson pas (los nos amagan). E a cò nòstre, dins una autra dimension, agachatz los professionals de la charradissa que passon plan al fenestron cara e cara amb de defendeires d'un pauc d'umanitat dins un mond destimborlat. Un cara e cara a 3 contra un en mejana (quand son pas totes del meteis avis), e de professionals plan vestits contra de mond que dins lor biais de parlar e de còps dins los contenguts an pas l'abiletat e la fashion per respondre segon los canons impausats per de medias ripolinats.

  • 3
  • 0
Enric Mala Tèsta
1.

Imaginvetz pas, çaquelà, que Netflix, cadena privada dels EUA, anava sosténer las ancians elegits d'esquèrra en America Latina ?!!!…

  • 6
  • 0

Escriu un comentari sus aqueste article