Bandièra01 1180x150: Comuna de Tolosa

Actualitats

Comença uèi una cauma de tres meses a l’SNCF

D’ara fins al mes de junh lo servici s’arrestarà dos jorns sus cinc. Protèstan contra la lei de reforma de l’SNCF que prepausa la privatizacion e la fin de l’estatut professional

| Alfenaar
Comença uèi una cauma de tres meses de l’SNCF dins tot l’estat francés que tocarà gaireben totes los ciutadans d’Occitània. D’ara e fins al mes de junh lo servici ferroviari s’arrestarà dos jors sus cinc per protestar contra la reforma de l’SNCF que poiriá comportar la privatizacion de la societat publica e la desaparicion de l’estatut professional dels caminòts.
 
L’intersindicala a causit aquel metòde de protèsta innovant: arrestar lo servici dos jorns sus cinc durant tres meses, çò que fa, en principi, 36 jornadas de cauma.
Segon d’estimacions de l’SNCF i aurà plan pauc de trens en circulacion durant las primièras jornadas de cauma e quitament “i aurà de linhas sens gens de circulacion”, çò rapòrta Le Monde, que cita de fonts pròchas de la societat de camins de fèrre.
 
La protesta es seguida pels sindicats CGT, UNSA, CFDT. Quand al SUD-Rail a dich qu’auriá preferit que los emplegats decidiguèsson en assemblada se vòlon seguir aquel calendièr de caumas o ben espandir la cauma.
 
Darrièr aquesta caumassa, i a una manca de dialòg entre lo govèrn francés e los sindicats. Tant d’un costat coma de l’autre s’acusan mutualament de voler pas negociar.
 
 
La lei de reforma de l’SNCF
 
Lo projècte de lei per un nòu pache ferroviari lo presentèt a l’Assemblada francesa lo primièr ministre Édouard Philippe lo  14 de març passat. Es un tèxt de solament uèch articles, mas los cambiaments que prepausa son prigonds.
 
D’un latz dobrís la pòrta a transformar l’actuala societat publicat SNCF en una societat anonima. De l’autre, se prevei l’eliminacion de l’estatut professional dels emplegats de la societat pels nòus engatjats qu’aurián pas los avantatges professionals de lors collègas. Legissèm dins l’article primièr: “Es dins aqueste encastre que serà en particular confirmat l’arrèst dels recrutaments dels novèls agents a l’estatut”.
 
En mai de tot aquò, los salariats veson que desenant es possible que se meta en question l’estatut public e lo principi d’unitat sociala de l’SNCF. I a pas tanpauc cap de garentida que las condicions del trabalh actualas se mantengan en cas de transformacion juridica de la societat.

 


 Font:Le Monde



abonar los amics de Jornalet
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
2.


Es la luita darriera
agrupem-nos e deman, Per los valents trabalhadors de l'Estat francès
l'Internacionala
serà lo sol human.
-------------------------------------

La prima es arribada e las flors auriòlas s'espelison pels camps cobrint-los de jaune.
---------------------------------------

Un fiscal de l'Alemanha Occidentala dels que quedan encara que son nazis, vol empresonar la libertat, aprofitet la guerra freda per pas reciclar-se en democràcia e sap pas que son Los Drets Humans de l'ONU ni los Drets dels pobles.

  • 2
  • 0
Pirolet
1.

Agachatz al fenestron los "casting" dels anti-SNCF e dels defendeires dels servici public. Los que correspondon als canons televisius e los que son pas gaire lepats per aquò, en pensant al public larg formatat per de decènis d'imatges e de sons de "bon gost". Sens comptar amb la peresa cultivada* dins aquela mena de salon de Mme Récamier a distància. D'intrada,lo prejutjat es servit e la discussion es inegala.

*Interrupcions publicièrias, questions superficialas, interrupcion de l'expausasicion dels arguments...

  • 3
  • 0

Escriu un comentari sus aqueste article