Bandièra01 1180x150: Comuna de Tolosa

Actualitats

La situacion en Catalonha e la persecucion dels curds a marcat l'Assemblada Generala de l'ALE

La formacion europèa pels dreches dels òmes e dels pòbles s'es amassada en Bavièra aquesta dimenjada passada

Un catalan, un occitan, un flamenc, una galesa, un còrs, una silesiana, una basca... son qualques-unes dels membres del burèu de l'Aliança Liura Europèa
Un catalan, un occitan, un flamenc, una galesa, un còrs, una silesiana, una basca... son qualques-unes dels membres del burèu de l'Aliança Liura Europèa | Dàvid Grosclaude

Mai de 230 delegats an participat aquesta dimenjada passada a l'Assemblada Generala de l'Aliança Liura Europèa(ALE), qu'a agut luòc a Landshut (Bavièra). Un eveniment qu'es estat marcat mai que mai per la situacion en Catalonha.

 

L'assemblada a nomenat lo catalan Oriol Junqueras e la letona Tathana Zdanoka sòcis onoraris de l'ALE. Amb aquel gèst, l'ALE a volgut desirar bon astre a Zdanoka per que perseguisca sa carrièra politica en Letonia, del temps que contunha de sosténer Jonqueras e demanda sa mesa en libertat.

 

Actualament, lo president de l'ALE es lo còrs François Alfonsi e son secretari general es lo catalan Jordi Solé. En mai d'aquò, lo burèu es compausat, entre d'autres, per un occitan, un flamenc, una galesa, una silesiana, una basca... Sa representacion al Parlament Europèu es de sèt deputats.

 

 

Aculhença d'una delegacion de l'HDP

 

Durant l'eveniment, l'ALE a tanben aculhit una delegacion de l'HDP, lo partit turc que paga fòrça car sas posicions en favor de la democracia en Turquia e qu'òbra pel respècte dels curds e de totas las minoritats del país. Es un partit opausat al nacionalisme exacerbat d'Erdoğan, e ten aperaquí dètz mila militants encarcerats.

 

"Anam ganhar aquela batalha per la democracia", çò diguèt lo representant de l'HDP davant los delegats dels partits de l'ALE. Puèi, s'adoptèt una mocion de sosten als curds atacats dempuèi plusors setmanas per l'armada turca; aquesta denóncia lo non-respècte dels dreches umans en Rojava e dins tot lo Curdistan en general: "Es un pòble utilizat dempuèi de decennis e abandonat quand aquò conven a certans interèsses economics", çò soslinhèt l'èx-èurodeputat Max Simeoni.

 

L'Aliança Liura Europèa (ALE), tanben coneguda coma Partit Democratic dels Pòbles d'Euròpa, es un partit qu'amassa divèrsas formacions politicas que defendon lo drech dels pòbles a l'autodeterminacion, los principis de la democracia parlamentària e los dreches umans.


 




abonar los amics de Jornalet
 
 
Fòto: Un catalan, un occitan un flamenc una gallesa, un còrs, una silesiana una basca... son qualques unes dels que compausan lo burèu de l'Aliança Liura Europèa
 
 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
1.

Una polida foto a Baviera ,cresi que hi ha tamben lo valent occitan Grosclaude.
Urrà ! la luita per la libertat dels pobles.

  • 0
  • 0

Escriu un comentari sus aqueste article