Bandièra01 1180x150: Comuna de Tolosa

Actualitats

Obama declarèt Nòva York zòna de catastròfa

Sandy daissèt un quinzenat de mòrts, provoquèt d’inondacions, e mai obliguèt de suspendre lo transpòrt public, de barrar d’aeropòrts e d’escòlas e d’evacuar aperaquí 400 000 ciutadans.


Lo president estatsunidenc, Barack Obama, declarèt ièr Nòva York e Nòva Jersey dins l’estat de “granda catastròfa” après las devastacions que faguèt l’auragan Sandy en la còsta èst dels Estats Units, en negar una granda part de Manhattan. Aquò permet que los fonzes federals sián disponibles pels afectats, coma o a explicat l’Ostal Blanc.
 
Lo passatge de l’auragan Sandy causèt un quinzenat de mòrts, segon lo primièr bilanç de victimas que faguèt ièr CNN, e inondèt fòrça carrièras a Nòva York. En total, la quantitat de victimas mortalas que causèt es de gaireben ochanta, la majoritat en Haití. Tanben i aguèt de victimas en Cuba, Jamaica e las Illas Bahamas.
 
Sandy toquèt tèrra ièr de matin, amb un vent de 130 quilomètres per ora. Lo riu Hudson sortiguèt del lièch e neguèt fòrça carrièras e estacions de mètro. Mièg centenat d’ostals foguèron destruches dins un quartièr de Nòva York a causa d’un incendi. Los pompièrs aguèron fòrça dificultats per agir pr’amor de las inondacions.
 
La causa de la majoritat dels mòrts, als Estats Units, foguèt la casuda d’arbres arrancats pel vent. En Carolina del Nòrd, l’istoric vaissèl britanic HMS Bounty s’aprefondiguèt amb setze personas a bòrd. Lo capitani moriguèt, un marinièr desapareguèt e se poguèt salvar los catòrze autres.
 
Calguèt barrar los tres aeropòrts de Nòva York e de milièrs de vòls foguèron anullats.
 
Nòva Yòrk es, dempuèi abans ièr, una vila fantauma. Las autoritats de la vila ordenèron dimenge l’evacuacion de 375 000 abitants dels airals mai pròches la mar a causa de l’arribada de l’auragan Sandy.
 
Totes los servicis de transpòrt public foguèron cancelats e lo cònsol demandèt a totes los nòvayorkeses non evacuats que sortiguèsson pas de l’ostal. L’auragan foguèt benlèu la màger tempèsta qu’afectèt jamai los Estats Units quand intrèt enfre tèrra ièr de nuèch, amb de vents fòrts e d’inondacions fòrça perilhosas dins la còsta èst, perque coïncidissiá amb una èrsa d’aire freg. Qualques expèrts e de mejans estatsunidencs an ja nomenat lo fenomèn coma “la tempèsta perfiècha” o Frankenstorm, en fasent un jòc de mots entre Frankenstein e storm (tempèsta).
 
Se crei que Sandy aurà un “impacte brutal” dins de vilas coma Boston, Washington, Baltimore e Filadèlfia, al delà de Nòva York, segon d’informacions de Reuters. Aquel auragan a ja causat cinquanta mòrts en la Cariba e se calcula que serà actiu almens fins a uèi, dimècres. 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Ferriòl Macip Jornalet
4.

#3 Qu'as arrason, de hèt er auragan qu'a portat mès hame e colèra en Haití e en Jornalet qu'èm en tot trabalhar entà aufrir-vo'n es informacions abantes dera dimenjada.

(a prepaus: en Cuba, on er auragan i passèc damb mès fòrça, es victimes son pòques mès de 10, e en nòrd d'America passen es 50)

  • 4
  • 0
Ernèst Guevara Jr. L'Avana
3.

A, los medias europèus…

La catastròfa a sagatadas las islas de Jamaïca e d'Aïti, e las gents que i son vicitmas i pas mai que los uèlhs per plorar, paurasses que son e que demoraràn. L'isla de Cuba tanben s'es presa la tempèsta en plen morre. Esperèm que la solidaritat locala e amb America del sud ajudarà los qu'o i an perdut tot… Vesi pas en qué aquò seriá mens grèu que la meteissa catastròfa a Nòva York. Los Antilheses i morrisson pas mens que los autres, quand i daissan la pèl !

  • 2
  • 0
Faidit Comuns
2.

En matèria de catastròfas, s'i coneis plan, lo Sr. Obama, prèmi Nobel per la patz....

  • 0
  • 1
Pirolet
1.

Es lo Sandy show! Davant un auragan aital sèm encara mens que "puppets on a string" entre las mans del grand Manejaire...

  • 1
  • 0

Escriu un comentari sus aqueste article