Almens 27 personas mòrtas e una seissantena de nafradas es lo tragic bilanç d'un atemptat al centre de Mubi, una vila del nòrd-est de Nigèria. Lo chaple es atribuit al grop jihadista Boko Haram, e l'aurián comés dos gojats menors que se serián suicidats. Lo primièr s'es fach espetar dins una mosqueta e lo segon, pus tard, dins un mercat ont se volián refugiar lo mond que fugissián la primièra explosion.
 
Segon l'AFP, qualques testimònis afirman que i aurá fòrça mai de victimas mortalas que lo nombre comunicat per las autoritats nigerianas.
 
Lo masèl s'es passat dins una region ont lo grop jihadista a causat la mòrt de mai de 20 000 personas dempuèi 2009, e la violéncia i a provocat mai de dos milions de refugiats.
 
 
L'utilizacion de menors
 
L'utilizacion d’enfants dins las atacas terroristas se repercutís tanben suls enfants liberats rescatats o que son arribats de fugir Boko Haram, puèi qu’aquò aumenta la paur e la sospiècha envèrs eles. En consequéncia, los mainats que son pas pus presonièrs s’afrontan al refús quand vòlon tornar integrar lors comunautats. Aquò fa créisser lor sofrença.
 
 
UNICÈF dona de supòrt psicosocial als enfants que son estats detenguts per Boko Haram, e trabalha tanben amb lors familhas e comunautats per que sián acceptats. De mai, l’organisme per l’enfança sosten d’activitats de tolerància, d’acceptacion e de reïntegracion.
 
 
1,7 milion de desplaçats e una famina sevèra
 
Aquela situacion se produtz dins un contèxt de desplaçaments massisses e de crisis alimentàrias. A l’ora d’ara, i a 1,7 milion de personas desplaçadas.
 
La region nòrd-èst de Nigèria patís grèvament la menaça de famina, amb mai de 450 000 mainats que riscan una malnutricion aguda ongan.