Lo forum ciutadan occitan pausarà sas valisas a Tolosa lo 22 de setembre 2018. Mas quinas seràn las tematicas ongan? Començam d’i véser mai clar! Lo comitat de pilotatge que recampa de jornalistas anóncia una “Dintrada” plan diferenta de l’an passat amb de matin un estat dels luòcs d’Occitània region per region. La tòca es de tornar trapar la dimension “panoccitana”, de metre en evidéncia çò que marcha, e çò qu’avança pas. Per cada region, de personalitats faràn un bilanç que cobrirà totas las tematicas que pertòcan los ciutadans occitanistas: ensenhament de la lenga, mèdias, cultura, democracia. En mai, un convidat europèu pausarà son agach sus la situacion nòstra en comparason amb çò que se passa dins son país e pertot en Euròpa. Un debat seguirà aquelas presentacions per completar o precisar las causas. Aurem aital en  fin de matinada un panorama pro complet de l’espandi occitan, de sas fòrças e de sas flaquesas.
 
L’aprèp-dinnada promet d’èsser mai ofensiva amb dos grands obradors que se debanaràn en parallèl. Los participants deuràn causir entre los dos questionaments prepausats: “Una granda manif?” o “Una novèla organizacion politica?”. Efectivament, 50 ans aprèp Mai de 68, l’ora es venguda de se bolegar! De personalitats seràn convidadas per s’exprimir sus cada problematica, e d’activitats en pichons grops seràn prepausadas…
 
Per clavar la jornada, una plenièra permetrà de far un bilanç de cada obrador, e serà seguida d’un escambi… que se perlongarà de segur a l’aperitiu!
 
 
 
 
 
Brunò Cecillon, Uc Jourde, Esther Mimart-Rangel, Gisèla Naconaski
pel comitat de pilotatge