Bandièra01 1180x150: Comuna de Tolosa

Actualitats

Un independent serà lo primièr ministre italian amb un programa d’afrontament amb l’UE

Giuseppe Conte, professor de drech de 54 ans, a pas cap de passat politic

Lo cap del Movement 5 Estelas (M5E), Luigi di Maio, a confirmat que lo jurista Giuseppe Conte es lo nom consensualament pachat amb la Liga Nòrd per que venga lo president italian del conselh dels ministres. “Sèm davant un moment istoric. Avèm prepausat lo nom de Giuseppe Conte al president de la Republica, Sergio Mattarella”, çò a explicat Di Maio dins una nòta publicada suls rets socials.
 
Es atal qu’aquel professor de drech de 54 ans, sens cap de passat politic, es vengut lo nom prepausat per venir primièr ministre e far un govèrn, s’a l’aprobacion de Matarella.
 
Di Maio a mandat un messatge als que critican que l’M5E e la Liga ajan elegit un primièr ministre non votat dins las urnas, en afirmar que Conte “èra comprés dins la còla de govèrn” de l’M5E quand presentèt sa lista de possibles ministres abans las eleccions de març.
 
Di Maio e lo cap de la Liga, Matteo Salvini, tenguèron de reünions al començament de la setmana amb Mattarella al sèti de la presidéncia de la Republica, e expliquèron lo pache de Govèrn encapat après dètz jorns de negociacions. Puèi, Di Maio compareguèt davant los mejans per expausar que lo país èra “davant un moment istoric” e que l’objectiu del govèrn que formarián l’M5E e la Liga seriá de melhorar la qualitat de vida dels italians.
 
Se ven primièr ministre, Conte deu presentar sa lista de ministres e puèi sometre sa causida al parlament, çò que serà pas complicat, bòrd que l’M5E e la Liga tenon la majoritat dins las doas cambras.
 
Mai de dos meses se son ja passats dempuèi las eleccions generalas de març e sembla qu’Itàlia pòt començar a sortir de la paralisi. Ara tendrà un govèrn que demandarà a sos sòcis europèus una revision de la politica monetària, lo pache d’estabilitat, lo pache fiscal o lo mecanisme d’estabilitat. L’M5E faguèt remarcar durant sa campanha electorala que voliá prene de distància amb lo projècte europèu.
 
Tanben en campanha anoncièron qu’aprovarián una idemnitat de 780 èuros per mes a las personas qu’aguèsson de dificultats economicas, un impòst unic per las entrepresas, las familhas e pels trabalhadors independents que virariá entre lo 15% e lo 20% dels revenguts, e que barrarián totes los camps —considerats irregulars— ont vivon de personas d’etnia ròm.
 
 
Paur demest los migrants
 
Los immigrats an paur del nòu govèrn eissit del pache de la Liga amb l’M5E. Los dos partits son convenguts de reduire l’immigracion e de bastir de nòus centres de detencion per accelerar las expulsions. “Dison que vòlon pas pus d’immigrants mas los italians an emigrat en divèrsas escasenças de lor istòria, especialament als Estats Units”, çò afirma a The Guardian un migrant originari de Ghana.
 





abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Francesc palma
3.

Que pague Na Rita lo deute dels l'estats europeus amb los bancs privats alemanhs e d'altras. Una maniobra de las dretas europeas per arruinar los estats europeus. Faire pagar la crisi que patiren los bancs, a los estats, e aprés no tornar los diners que los havien daissat los estats. E tot amb lo consentiment dels dirigents de lUE coma Junquers e companhia,los laires del poble per donar-los als rics banquers.

  • 1
  • 0
Mèfi ! 31
2.

Un impòst unic amb taus unic es anti-redistributiu, que ten pas compte de la capacitat contributiva de cadun en fonccion de son revengut. Es una politica fiscala de dreita.

  • 5
  • 1
Pirolet
1.

Un italiexit aprèp lo brexit? Es vertat que vist coma viran las causas en Euròpa, balha envèja de prene son camp e de lo fotre!

  • 7
  • 0

Escriu un comentari sus aqueste article