Lo primièr ministre de Serbia, Aleksandar Vučeć, anoncièt divendres passat que son país fariá ongan un referendum per demandar als ciutadans se cal acceptar l’independéncia de Kosova, declarada unilateralament de Serbia en 2008. Dempuèi alara son 117 estats qu’an reconegut Kosova coma país independent, dont 23 sus 28 membres de l’Union Europèa. Espanha es un dels païses que refusa de lo reconéisser.
 
Serbia a pas tanpauc reconeguda l’independéncia de son anciana region mas ara o poiriá far s’o autorizan los ciutadans.
 
La rason del referendum es que Serbia a fòrça avançat son procès d’adesion a l’Union Europèa e ne negòcia ja l’intrada, mas aquesta restarà blocada fins que se resòlga las relacions entre Serbia e Kosova amb una reconeissença mutuala. Ja que la Constitucion sèrba enebís la reconeissença de l’independéncia de Kosova, cal far un referendum que la modificariá abans d’i poder establir de relacions diplomaticas.
 
Un còp resolgut lo conflicte, l’Union Europèa poiriá accelerar l’intrada de Serbia dins l’UE, qu’es la principala aspiracion de son govèrn actual. Per ara, Kosova es dins la lista de candidats potencials a l’integracion europèa, mas a pas entamenat cap de negociacion.