Vinilkosmo, l’ostal d’edicion de musica en esperanto amb sèti a Dònavila (Lauragués), ven d’editar lo primièr disc de Patric en lenga internacionala jos la direccion artistica de Joan-Marc Leclercq . Lo disc es lo primièr d’una seguida d’edicions d’una campanha d’engatjament.
L’album Okcitanio (Occitània) presenta quinze cançons del repertòri de Patric demest las qualas i a de cançons tradicionalas e tanben de composicions pròprias. S’agís de quinze cançons que presentan de tradicions, de sentiments, de colors, de sons e d’encastres d’Occitània.
Lo projècte s’es menat a tèrme jos la direccion artistica de Joan-Marc Leclercq amb las voses dels còrs d’esperantistas de Tolosa e d’Arièja.
Lo cantaire occitan Patric a sedusit maites còps lo public esperantista, mai que mai en 1998 a Montpelhièr dins l’encastre del Congrès Mondial d’Esperanto e en 2011 al Congrès Francés d’Esperanto a Seta.
En aquel darrièr congrès, s’i presentèt lo libre Okcitanaj kantoj en esperanto(De cançons occitanas en esperanto), editat en Russia. Lo libre amassa las cançons occitanas que cantèt Patric, segon las traduccions en esperanto d’André Andrieu amb las adaptacions de Ludmila Novikova.
Lo primièr d’una campanha d’engatjament
Vinilkosmo ven de trobar un biais mai participatiu e rendable per publicar de disques en esperanto e a convidat lo public esperantofòn a participar a una campanha d’engatjament per decidir quals projèctes cal produsir e publicar.
Per aquò far, l’ostal d’edicion de disques lancèt una campanha on se presenta los divèrses projèctes per que lo public s’engatgen a prometre qual disc o quals disques compraràn, e aital Vinilkosmo los editarà. Dins aquel sens, Vinilkosmo produsís sonque los disques qu’an pro d’engatjaments.
De las tretze propòstas inicialas, l’album de Patric, Okcitanaj kantoj en Esperanto, es lo que mai d’engatjaments a recebut e lo primièr a èsser editat. Seguirà un album del nòu grop brasilièr de metal en esperanto, BaRok’.
Lo disc se pòt comprar sul sit de Vinilkosmo o se pòt descargar d’Internet en format mp3 o ogg.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Cal esperar que pòsca balhar un vam novèl a aquel artista que vesèm pas gaire en concèrt o dins de festenals. Demòra interessant coma projècte artistic pr'aquò. Aquò's vengut lo temps de la respelida per Patric !
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari