Bandièra01 1180x150: Comuna de Tolosa

Actualitats

Vancouver dona a doas plaças de noms indigènas al mièg d’una nòva batalha de sèt Primièras Nacions contra un oleoducte

Las comunautats autoctònas crenhon d'efièches environamentals advèrses se s’agrandís l'infrastructura petrolièra

| Andrea Reimer 惠綺文
Fai un don a Jornalet

La comuna de Vancouver a renomenat doas plaças del centre vila amb de noms sortits de las lengas halkomelem e squamish, parladas pels pòbles autoctòns de la region ont se situa aquela vila canadiana. Segon lo cònsol màger, Gregor Robertson, es un signe de “reconeissença” a las Primièras Nacions que parlan aquelas lengas (Musqueam, Squamish e Tsleil-Waututh) e una pròva de "l'engatjament per un nòu partenariat” amb elas.
 
Una de las plaças portava lo nom de la reina Isabèl. Tre ara se nomenarà šxʷƛ̓exən Xwtl’a7shn. Vòl dire “l'endrech ont òm es convidat”. Cossí se pronóncia? Fòrça aproximat, seriá legir, a l'occitana, “shtlekhen khotlaishen”, ont “kh” es similar a la “j” en castelhan. L’autra plaça, que portava lo nom d’una galariá d’art, s’apelarà šxʷƛ̓ənəq Xwtl’e7énḵ, “l'endrech ont se fa una amassada culturala”. La pronóncia aprochada es “shtlénec khotlanc”.
 
Mas aquela reconeissença coincidís amb una nòva batèsta d'aquelas meteissas Primièras Nacions de la còsta de la Colómbia Britanica. S'agís de lor oposicion a l’espandiment de l’oleducte Trans Mountain, que transpòrta de petròli d’Albèrta fins a l’estrech de Georgia, dins l’ocean Pacific. L’oleoducte es proprietat de la societat estatsunidenca Kinder Morgan, mas lo govèrn de Canadà anoncièt lo mes passat que n'aqueririá l'infrastructura per s'assegurar que se bastiguèsse malgrat l’oposicion dels environamentalistas e de certans pòbles autoctòns.
 
Qualques Primièras Nacions —las mai luènhas de la còsta— an signat d'acòrdis economics amb Kinder Morgan e ara quitament estúdian d'investir d'argent dins l’oleoducte. Mas las Primièras Nacions de la còsta de Vancouver —las que la Comuna lor a rendut omenatge— argumentan que l’extension de l’oleoducte aurà d'efièches immediats sus l’ecosistèma local e multiplicarà per sèt lo transit de naus petrolièras per l’estrech de Georgia, amb l’aument del risc d’escampaments dins l’ocean.
 
Las protèstas las an tanben jonchas de membres dels pòbles autoctòns de l'estat de Washington, als Estats Units, qu’a un limit comun amb la region afectada.
 
Sèt Primièra Nacions, e mai las comunas de Vancouver e Burnaby, an portat davant la justícia l’aprobacion de l’oleoducte, malgrat que l'infrastructura siá aprovada pel govèrn canadian.
 
 
 
Aquesta nòva es adaptada de Nationalia, amb qui Jornalet ten un acòrdi de cooperacion.
 


 


 
 




abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

"Tàrrega" Igualada (PP.CC.)
1.

I si diguessim que to s'ha de fer en la llengua autòctona, massa fort, però pense-m'ho.
Visca la Terra...Lliure!
L'Ernest, "El Tàrrega".

  • 0
  • 0

Escriu un comentari sus aqueste article