Los Angleses son mai fòrts: confirmacion ne foguèt balhada dissabte de vèspre a Hull.

La bona volontat dels Blaus i poguèt pas res, d’autant mai que l’arrièr Stacul, assucat al cap d’un quart d’ora de jòc, daissèt l’equipa cambavirada amb Tomas Bòsc replaçat a son pòste. Cada acceleracion anglesa pausèt problèma als Blaus, malgrat un temps de dominacion dins lo primièr temps que se clavèt sus un 20-0 pels Blancs.
 
Dins lo segond temps, dos novèls nafrats (Mounis e Larroyer) compliquèron lo jòc dels Blaus que pleguèron 4 cops. Kane Bentley capitèt de salvar l’onor a dètz minutas de la fin per un ensag transformat per Tomàs Bòsc: 44-6 al final.
 
De regretar lo comportament agressiu del paquet anglés qu’a pas besonh d’utilizar de tals arguments per s’impausar.
 
dimenge, caldrà tornar sus la pelena, a Salfòrd, per afrontar los Angleses un còp de mai pel compte de la finala d’aqueste Tornèg de Tardor (18h, de seguir sus BeinSport) que mostrarà lo camin que demòra de complir als Blaus en vista de la Copa del Monde de 2013.
 
Dimenge es amb un temps plan britanic (o de Totsants, coma volètz) que l’ASCarcassona recebiá son vesin Limós e estrenava per aquel rescontre de tria las novèlas tribunas de l’estadi Domèc.
 
Los jaune e negre prenián las causas en man e marcavan d’entrada tres còps pels avants Offerdahl e Poching, puèi pel centre Savage. Limós se ne remetiá a sas individualitats (Murcià e Ramage) per tornar a 16-12. Mas, sus un remandadís lèu jogat als 20 mètres, l’alièr Gregòri Mazard preniá un trauc de mirgueta e filava marcar aprèp 70 mètres de corsa: 22-12 a la pausa pels locals.
 
Lo segond temps, vegèt las defensas prene lo pas sus las volontats ofensivas, complicadas per una pauma-savoneta. Murcià ramenèt son equipa a 22-18 mas Mazard (designat òme de la partida) recentrava al pè per son arrièr Guiraud que puntava e transformava. Victòria per Carcassona: 28-18.
 
De notar la bona prestacion del dobertura Vincent Anderson (campion del monde 2008 amb los kiwis) per sa primièra aparicion, al pòste de dobertura, jol malhòt de l’equipa de Ciutat.
 
Dimenge, tres rescontres del campionat Elit son al programa: en cap-d’aficha, l’afrontament al Molin entre Lesinhan e Pià que foguèt lo borrèl de l’equipa de Corbièras l’an passat en la batent dins las mièja-finals de la Copa e del campionat.
 
Partidas dobèrtas en tèrra aquitana entre Vilanòva e Limós e en país catalan ont, a Brutús (sioplèt!) , los Dragonets recebràn Tolosa; A Limós, dimenge, se disputarà un tornèg dedicat als joves e a las escòlas de rugbí per la memòria d’Ervé Guiraud.
D’esperar que l’estiu de Sant Martin serà de la partida e que la jornada serà bèla, a contrari del Tornèg Ostric que foguèt annulat a Carcassona lo 2 d’octobre passat en rason de las pluèjas.




Alan Roch