Bandièra01 1180x150: Comuna de Tolosa

Actualitats

InternacionalPolitica

Emmanuel Macron e Albert Rivera estúdian d’anar ensems a las eleccions europèas

Poirián pereu èsser acompanhats del Partit Democrata Italian de l’èx-primièr ministre Matteo Renzi

| Christophe Castaner
Emmanuel Macron e Albert Rivera estúdian de se presentar amassa a las eleccions europèas. Lo partit espanhòl Ciutadans e lo francés La Republica en Marcha son a trabalhar sus la creacion d’una plataforma que lor permeta de concórrer ensems als comicis europèus de mai de 2019. Poirián pereu èsser acompanhats del Partit Democrata Italian de l’èx-primièr ministre Matteo Renzi.
 
Ciutadans vòl ben jónher la volontat dels macronistas de “cambiar Euròpa prigondament”, çò diguèt lo delegat de La Republica en Marcha, Christophe Castaner, après una reünion amb Albert Rivera e José Manuel Villegas, respectivament cap e secretari general del partit espanholista.
 
Segon Castaner, trabalharàn ensems per prepausar una “plataforma de convergéncia comuna” e cercaràn “d’atraire totes los sòcis necessaris” amb l’idèa de reformar l’Union Europèa. E mai a anonciat que l’ALDE, grop qu’amassa de partits liberals e de democratas europèus, es un “sòci evident”.
 
Castaner apondèt que volián “jónher totes los progressistas europèus  independentament de lor origina politica o lor percors” e afrontar los “populismes” de païses coma França o Itàlia. Atal, la proposicion poiriá comprene lo partit de Renzi.
 
“Ciutadans e La Republica en Marcha se semblan fòrça” çò a afirmat Castaner, pr’amor que —segon el— los dos partits nasquèron amb lo desir de “renovelar” las politicas en Espanha e França. Quitament a dich que los dos partits tenon “un ligam plan fòrt”.
 
 

 

 
 
 




abonar los amics de Jornalet
 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
5.

Los falangistas espanyols pagats per la banca privada e l'ultra liberal Macona representant dels banquiers, menats jos las mateissas bandieras fachistas.

  • 2
  • 0
Pirolet
4.

#3
E òc a passat temps: los afrancesats èra al sègle XVIII. Aqueles dos, ara, son americanisats duscas a las aurelhas. Los espanholistas e los francesistas s'enganan: ara lo tanden Rivera-Macon vòl enebir las lengas que son pas d'estat per una pretenduda defensa de l'espanhòl e del francés, mas en realitat se'n chautan : l'etapa que ven es l'eliminacion de totas las lengas per generalizar lo globish, lo sòòòòòmi del MERCAT totpoderós. E per aquò cultivan dins la clòsca de las gents un utilitarisme de pissotièra.

  • 8
  • 0
Lo Jaumet
3.

Lo jacobinism istoric frances adoba paternalament e frairenalament son pichot fraire espanhol. A passat temps aquo se sonava d'afrancesats. Per la gloria mai granda de l'imperialism parisenc qu'a l'ipocrisia de se presentar coma universal !

  • 10
  • 0
Enric Mala Tèsta CNT@1936.CAT
2.

Emmanuel Macron e Albert Rivera estúdian de se presentar amassa a las eleccions europèas. Lo partit espanhòl Ciutadans e lo francés La Republica en Marcha son a trabalhar sus la creacion d’una plataforma que lor permeta de concórrer ensems als comicis europèus de mai de 2019.

D'un costat, una republica que marcha subre l'onor e la carn dles pòbles que non parlan francés, e que fan guèrra despietadosa a tota oposicion frontala a l'individualisme capitalista (Cf. Nòstra Dòmna de las Landas), e de l'autre costat, un partit criptofaissista qu'apròba la repression sanguinosa del referendum ciutadan de Catalonha a còps de trica pel cap de las vièlha dòmnas qu'anavan votar ! Es pas la pena de votar front nacional. Avèm trobat aquí una coalicion faissista pro reganhuda per èsser a l'encòp ultraliberala (e enriquir vergonhosament los rics als despens dels paures) e per ficar a còps de barra tre qu'òm vòl senhalar qu'aquò non conven pas al pòble.

Manca pas mai qu'un partit pretendut democrat, tant a dreita, e tant opausat als interèsses e a la dignitat dels pòbles coma los dos primièrs e òc-ben : "ni dreita, ni esquèrra", sonque ultradreita !

  • 11
  • 0
Pirolet
1.

Los jacobins ultraliberals e estatsunianolatres se son reconeguts. Enfin, Macron aurà pas besonh de nos applicar qualque article 155: fa 8 sègles qu'an fach l'Anscluss sus Occitània e que nos daissan pas respirar. Serà polida Euròpa se la refòrman de lor biais! E aprèp lo mond votarà qualque Trumpetaire per ensajar de se'n desfar...

  • 16
  • 0

Escriu un comentari sus aqueste article