Bandièra01 capçalera  1180x150: Novestivada

Actualitats

Multa recòrd de la Comission Europèa a Google

Segon l'executiu europèu, lo gigant estatsunidenc a violat dempuèi l'an 2011 la nòrma europèa antimonopòli

Multa recòrd de la Comission Europèa (CE) a Google. Lo gigant estatsunidenc deurà pagar 4,34 miliards d'èuros per aver fach servir lo sistèma Android de telefòns mobils coma un monopòli. La CE considèra que Google a impausat "de restriccions illegalas" als fabricants dels dispositius Android e als operators de rets mobils per "consolidar sa posicion dominanta" dins lo mercat d'Internet, mai que mai dins un contèxt que près de l'80% dels dispositius mobils intelligents en Euròpa i foncionan amb lo sistèma Android.
 
Segon l'executiu europèu, Google a violat, dempuèi l'an 2011, la nòrma europèa antimonopòli. La comissària encargada de la concurréncia, Margrethe Vestager, a dich que Google impausa de restriccions sus Android per "garentir que lo transit dels dispositius Android se dirigisca devèrs lo motor de recèrca de Google". Una practica qu'es contra las règlas de concurréncia, çò considèra Vestager, car a pas donat a las societats rivalas "l'oportunitat d’innovar e de far de concurréncia segon los meritis" de cada societat. "Google s'es servit d'Android coma veïcul per consolidar lo domeni de son motor de recèrca”, çò a dich.
 
A l'ora d'ara, Google afronta tres enquèstas de la CE sul monopòli. Al delà de l'afar sul sistèma Android, l'executiu de la Comunautat Europèa a denonciat la societat estatsunidenca en d'autras escasenças per l'usatge que lo fa de son sistèma de recèrca e de publicitat sus Internet, dos metòdes que segon la CE restrenhon la capacitat de causida de l'usatgièr.

 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pirolet
1.

Multa record mas pas grand causa pels tombarèls de milions que manèja Google.

  • 1
  • 0

Escriu un comentari sus aqueste article