Bandièra01 capçalera  1180x150: Novestivada

Opinion

Òme d'òc, as dreit a l'informacion

Marçal Girbau

Marçal Girbau

Filològ e promotor cultural, especializat sus las relacions occitano-catalanas.

Mai d’informacions
Es nascut. A la fin. L'avèm, es nòstre! Lo primièr jornal pensat e escrit en occitan, per Occitània. Per parlar de tot çò que se passa al país e al mond sencer: en libertat, en lenga nòstra. Per charrar, per debatre, e tanben per explicar lo nòstre país als autres, a las autras nacions. Perqué tota la planeta sàpia que i a un país que vòl viure, pensar e escriure en sa lenga. Es pas tan extraordinari, non?
 
E òc, se volètz plan, amables lectors, nos podrem trobar aquí un còp per setmana. Vos contarai pas tota la vertat, mas vos dirai pas cap de messorga. O almens, vos ne rendretz pas compte! De còps vos farà plan plaser de legir çò que escriurai. De còps pensaretz que paga pas lo còp d'i perdre lo temps. E de còps, simplament, vos farà cagar.
 
Aquesta es la tòca dels opinaires, aquesta mena de gents que nos cal emplir un espaci de tèxt amb la nòstra pensada. Quina arrogància, benlèu pensaretz! I soi d'acòrdi. Çaquelà, a un país li cal tanben aver un pauc d'arrogància en sa lenga, aital coma un pauc d'umilitat, un bocin de gentilesa, d'ironia, de ràbia, de fòrça, de vam... e d'informacion! A un país li cal l'informacion en sa lenga. Punt. Prometi, doncas, que serai un pauc arrogant, umil, gentil, ironic, rabiós, fòrt e qu'aurai pro de vam per vos informar cada setmana de çò que se passeja per ma tèsta. Planvenguts e plan vòstre!

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Jacme Tolosa del Lengadòc e de Gasconha
1.

Vò avèm dreit a l'informacion en lenga occitana, mas pas una informacion manipulada, orientada melhor que l'Estalin zo fasiá un còp èra. Car sabèm çò qu'es aquesta premsa, n'avèm un exemple a Tolosa ambe La Dépêche du Midi, e quitament dins la pichoneta premsa associativa.
Nos cal primièr la diversitat de la premsa catalana en Occitània; perqué l'avèm pas ? Perqué los Bascos son capables d'aver la premsa basca sobre la còsta gascona dinca Mimisan e que los Catalans -que la premsa es mai fòrta- o pòdon quitament pas aver La Vanguardia en catalan pertot en Occitània, a Marselha, Niça, Montpelhièr, Tolosa e Bordèu. Mas volèm pas sonque La Vanguardia, volèm ARA, AVUI, SEGRE, El Periódico, Diari de Girona, Diari de Tarragona, El Temps, Los diaris dels Balears e de València (en catalan). O volèm tot en Occitània.

  • 0
  • 0

Escriu un comentari sus aqueste article