Bandièra01 1180x150: País Invisible

Opinion

“Pensatz qu’ai pas que doas neurònas dins lo cap?” (Nicolas Sárközy)

Nabilla Benattia, la coneissètz pas?
Nabilla Benattia, la coneissètz pas?
Sovenirs e… sospirs… Lo Provençal Yvan Audouard [1914-2004], un escrivan d’expression francesa de conéisser e de legir o de tornar legir —machista infame! segon  los critèris d’anuèit— escriguèt o racontèt que, quand vesiá passar una “joinessa polideta” e “facha al torn” (veire Brassens), disiá d’ela: “Gaita la coma es belòia; quand camina, aquela chata a lo cuol que canta!”
 
Omenatge bèl e sens vulgaritat de mon punt de vista mas degun es pas obligat d’èsser d’acòrd…
 
Perqué vos disi aquò en preambul? Unicament per çò que veni de legir sus la tela que “Nabilla Benattia [aviá insultat] Catherine Deneuve”. Nabilla, la coneissètz pas?
 
E dejós las fòtos de las doas dònas —ne i a al mens una!— un article ont lo jornalista de servici, solide, un jornalista d’investigacion, nos explica que Nabilla escriguèt un bresilhadís per dire à l’autra qu’èra pas qu’una vièlha sauma — “Vieille jalouse aigrie… avec tout le respect que vous dois”. Vesètz totjorn pas quala es?
 
Insulta gratuita? Que non  pas. Figuratz vos que Catherine Deneuve declarèt dins lo JDD: “Amb las tecnologias novèlas, òm pòt veire un fum de monde qu’an milions de followers e qu’an pas fach res! I a pas pus de stars en França. Una star es qualqu’un que se deu pas mostrar de longa e que deu saber damorar dins la retenguda.” Naturalament, Na Deneuve menconèt pas degun.
 
E ben, auriá degut! Nabilla —sètz segurs que la coneissètz pas?— se sentiguèt ofensada e rebequèt de tira! Encara urós que li aguèsse pas fach un procès… a la Deneuve! A! mas…
 
E se compren! Ieu tanpauc auriái pas suportat de me daissar insultar per una femna septuagenària que son sol trabalh es estat de far de films dempuèi 1956, d’aver d’Oscars, de Cesars,, de prèmis internacionals, etc., e qu’en mai d’aquò critica las “tecnologias novèlas” per çò que sap pas se’n servir. Aquela femna, solide es “tròp”!
 
En fasent son bresilhadís, la Nabilla mostrèt que sabiá, primièr, legir e, segond, bresilhar amb son telefòn intelligent —o deu èsser per dos, aquel telefòn!— e prenguèt, benlèu sens i pensar de tira, la defensa de totas aquelas vedetas que lor paire lor a “daissat en eretatge, un bèth borit dens lo corsatge e, per rostit un bèth darrèr.” [A.T. 1900]. La coneissètz totjorn pas?
 
Un tal comportament de la part de Nabilla, una tala responsa plan soscada daissa ben augurar de las stars jovenòtas  a venir…
 
Mas coma l’ai pas jamai vista, soi pas segur se “quand camina, a lo cuol que canta!”

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article