Bandièra01 1180x150: Comuna de Tolosa

Opinion

La deriva autoritària

Maime Caillon

Maime Caillon

Engenhaire de formacion, militet dins mai d'una associacion ecologista dempuei sos 19 ans.

Mai d’informacions
A la debuta dau mes de julhet, la justícia balhet rason aus opausants a la restanca de Sivens. Son estats anullats la declaracion d’utilitat publica, l’autorizacion d’eissartatge e la derogacion sus las espècias protegidas. E mai l’Estat es estat condemnat a paiar 3750 euros a las associacions. “I aurà faugut un mòrt per que quò s’aplantar” çò disset Ben Lefetey, pòrtaparaula dau collectiu Testet que reunís fòrça opausants.
 
Quel afar, en mai de mostrar lo pauc de consideracion qu’a lo governament per las question environamentalas, soslinha sa deriva autoritària. D’efiech, son biais de governar es l’afrontament: a Sivens o a Nòstra Dama de las Landas contra los ecologistas, au parlament contra sa majoritat e dins la rua contra los sindicats a prepaus de doas leis economicas de las importantas. Hollande e Valls vòlen governar tots sols, contra la separacion daus poders, en utilizar la fòrça d’acianta tuar.
 
Qual autoritarisme es legitimat per las tragedias dau terrorisme coma la que toquet Niça lo 14 de julhet. L’estat d’urgéncia prolonjat es utilizat contra los opausants au governament, pusleu que de concernir nonmàs la lucha contra l’islamisme. E las reaccions dau monde politic au drama que visqueren los niçards mostra que lo resultat de l’eleccion presidenciala venenta farà mas que renforçar quela deriva. Sens parlar dau scenari catastròfa de l’arribada au poder de Marine Le Pen.
 
Me risque a la politica-ficcion en imaginar un autre scenari tant desastrós. De las tensions mai que fòrtas dins lo país, benleu d’autres atemptats, porriàn menar lo governament a trobar un biais per reportar las eleccions. Se mantendriá per garantir la securitat de tots e esperar un moment mai propici per organizar l’escrutinh presidenciau.
 
Entau, la democracia es en dangier, menaçada quitament per los que disen que la vòlen defendre. Deven demorar vigilants e exigents per son respecte.
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Lo raiòu Cevenas
1.

Bien d'acòrdi emb de vos : ne'n vòlon pas dau dialògue. Vòlon governar de lur biais.
Son ben de dirigents de país ! Son pas de representants dau pòple, de la votz collectiva.

Per de qué lo monde contunhan de s'acorsar a las urnas ? !
Acceptan per lur país ce qu'acceptariáun solament pas per una associacion : es a dire que lur president(a), dau moment qu'es estat elegit, siègue un dirigent e non pas un representant.

Segon ieu, lo jorn de las eleccions presidencialas, faudriá que los 44 milhons d'electors davalèsson per carrièiras. Puèi, que decidiguèsson de fargar una democracia participativa e relocalizada.

  • 0
  • 0

Escriu un comentari sus aqueste article