Bandièra01 1180x150: País Invisible

Opinion

Desgooglizem Internet

Lo Quentin

Lo Quentin

Apassionat de lengas, ai començat a recuperar la lenga en 2011 e dempuèi ensagi d’obrar per l’occitan coma pòdi.

Mai d’informacions
Amb aqueste article me prepausi de vos far conéisser los servicis utilizats per l’associacion francesa Framasoft dins sa campanha Dégooglisons Internet, aquò per doas rasons:
 
1) M’agrada aquesta iniciativa de descentralizacion e lors posicions tocant la vida privada
 
2) Mantunas aisinas son disponiblas en occitan gràcias al logicial liure e a las contribucions de las comunitats.
 
L’objectiu de l’operacion Dégooglisons Internet es de donar d’alternativas, liuras, als servicis de los grands grops apelats GAFA (Google, Amazone, Facebook e Apple). Aquí seriá mai per vos levar del servici de Doodle, mès avètz trapat l’idèa.
 
Sabètz segurament qu’aquestas entrepresas son americanas del Nòrd e doncas an un biais ben diferent de nosautres de respectar la vida privada del mond, per èsser forçadas de fornir d’informacions suls utilizaires. Sens èsser cercat per la polícia, benlèu que vos agradarà pas que vòstras informacions coma vòstra adreça, atge, mestièr, orientacions, patin cofin, siasquen vendudas per vos mandar de reclamas o quicòm mai.
 
Totas las aisinas d’aquela associacions son liures, podètz los copiar, modificar, distribuir, installar sus vòstra servidor, tot çò que volètz.
 
Doncas, qualqu’un que vòl un logicial en lenga nòstra pòt zo far, li cap pas que traduire uns fichièrs tèxtes. Çò bon amb lo liure es que, parli de mon experiéncia, degun vos demandarà pas l’interès de l’occitan, se trufarà pas de vos o unas conerias mai. Los desvolopaires son contents de poder tocar mai de public e aquò dòna mai de valor a lors logicials. S’avètz pas lo temps per traduire mès qu’avètz vist una fauta, la podètz corregir, cadun ajuda coma pòt.
 
Ara vòli parlar de Framadate. Es un servici en linha que vos permet d’organizar de rencontres, de causir amb un sondatge sus un tèma que volètz.
 
Per exemple; amb vòstra còla d’amics avètz enveja d’anar veire un filme al cine dins la setmana. L’aisina vos permet de crear un sondatge de datas de projeccions e de poder trobar lo moment que la màger part dels participants al sondatge pòdon èsser disponibles
 
I a un fum d’opcions coma mandar un corrièl per convidar lo monde a votar, partejar lo ligam del sondatge, etc.
 
E tot aquò, o podètz far en occitan dempuèi la prima 2016!
 
Se sètz una organizacion que deu sovent trapar de datas aital per d’eveniments, auretz las explicacions per montar vòstre Framadate privat sus vòstre servidor. Bona planificacion:)


 
De vesitar framadate.org





Jornalet es possible gràcias al sosten economic e jornalistic dels legeires e benevòls. Se podètz sosténer en venent sòci dels Amics de Jornalet o de l’associacion ADÒC, contribuiretz a far un mèdia mai independent e de melhora qualitat.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Felip Maurici
5.

Òc-ben ! Aquò's imperatiu de Desgooglizar la tialaranha...

Per començar, vos prepause aquelh motor de recèrcha, sonat “duckduckgo”, que sa particularitat vertadèira es de vos espiar pas coma o-pòu faire son cosin lo Google : https://duckduckgo.com/

Aquí tanben lo liam d'un fimonet que ne'n parla lèu-lèu : https://www.youtube.com/watch?v=qR_hmTMou_4

  • 0
  • 0
Joan Francés Lion
4.

#2 ara passas al panoccitan %)?

  • 1
  • 1
Quentin Tolosa
3.

Mercés !
L'operacion es apelada aital mès es pas sonque Google.
Mercés Guilhèm per aver donat d'alternativas ! Vòli subretot far conéisser las aisinas d'aquela operacion que son disponibles en lenga nòstra.
Quitament, nos parles de Wordpress. Lo problèma es qu'es tan lo motor de Blog/site web qu'es apelat aissí, que lor plataforma d'albergament, deu pas èsser clar clar per tot lo mond. Wordpress es disponible en occitan, mès s'avètz solament besonh de montar un blog/site , rapid, leugièr, sens se cargar una basa de donadas, avètz PluXml qu'adori ! Es disponible en OC e un fum d'apondons/extensions (plugins en anglés) son tanben traduches en lenga nòstra, n'i a un per bastir una botiga qu'es sonque en francés, anglés e occitan :)
www.pluxml.org

Ghostery es pas mai recomandat per la comunitat, mès parles d'un punt important !
Sens aver de compte chas Google, en fasquent pas de cercas sus Google, aquel sap ont anem perque los sites son cargats de còdis Google Analytics per que'l mond age d'estats. de visitas...çò que dòna per manjar al gròs Google =/ La meteissa causa en Facebook, avètz pas de compte ? Lo Facebook sap qualses sites visitatz ! Gràcias als botons de partatge o aquelses cadrons que dison "2 de vos amics aiman aquesta pagina" s'avètz un compte. Fitan tot...ieu disi fintaires per "trackers".

M'agrada que la lenga occitana siasque inclusa dins aquel operacion de descentralizacion e recuperacion de la vida privada, per aquò ai decidit partejar aquò amb vosautres :)

Una informacion mai : ièr la traduccion occitana foguèt fusionada per la version venanta de Framadate, aqueste còp serà completa completa !
Autre informacion : arriba lo breton tanben !

  • 0
  • 0
Bajon Theò Bedarrida (Comtat Venaicin)
2.

Polit article mon brave ! Ara non emmerçe plus que Duckduckgo, en plus es ben melhor, trobe !

  • 2
  • 0
Guilhèm Thomas Tolosa
1.

Un article plan interessant.

A títol personal me soi "desgoogelizat" gaireben completament fa un brieu ara.

- Emplègui Firefox. Boycòti Crome. Boycòti pas vertadièrament mas vesi pas l'interès de l'emplegar. Soi simplament demorat fisèl a Firefox e a son esperit qu'aimi fòrça.

- Passi pichon a pichon a "Duckduckgo" coma motor de recèrca. Mas devi dire qu'òm s'acostuma fòrça a Google, e que en pistant las nòstras recèrcas Google demòra lo motor lo mai eficaç. Mas ai tanben constatat qu'amb las annadas "Duckduckgo" deveniá de mai en mai performant. E qu'amb qualques mots clau en mai podiá èsser gaireben equivalent.

- Ai pas de compte Gmail. Ni mai de compte "Google". Me passi dels comentaris sus Youtube, mas efectivament, a l'ora d'ara es dificile de se passar completament del grand Y.

- Pas de Blogger : puslèu Wordpress.

- Subretot ai installat Ghostery sus Firefox. Es un add-on que permet de detectar los "tracaires" (o "tracador" ? De maquinas que tracan ... Alò Sumien ? "3615 lingüista occitan") que vos pistan sus la tèla e de los blocar.

Es amb aquò qu'ai un pauc "descobèrt" l'espandida de la dominança de Google sus la tèla.

Gaireben cada siti (quitament Jornalet.com) es equipat de "Google analytics" qu'es un aplèch que permet als webmèstres de far d'estatisticas sus las visitas. De saber d'ont venon e ont van los visitors (se m'engani pas). Ont que me passegèsse mon "Ghostery" es totjorn en tren de blocar "Google analytics".

Vòli pas alimentar las tèsis paranoïacas mas ai un pauc lo sentit que "Google", gràcias a "Google analytics" es en mesura de pistar cada internaute.

Aprèp, soi d'accòrdi, cal pas centralizar l'internet ! :)

  • 8
  • 0

Escriu un comentari sus aqueste article