Bandièra01 1180x150: País Invisible

Opinion

Article 155. Sirventés per Catalonha

Gèli Grande

Gèli Grande

Emplegat a La Pòsta, escriu de cronicas dins la revista Lo Lugarn. Es afogat de rugbi (subretot) de XV, de bona literatura e de bon cinemà quina que siaga la lenga.

Mai d’informacions
12 de setembre de 2017
 
Occitània: Aniversari de la batalha perduda de Murèth …
 
Per que èsser independent(ista)s se los autres o pòdon èsser a nòstra plaça, del costat de Barcelona per exemple.
 
 
20 de setembre
 
De Barcelona estant lo colonialisme espanhòl nos confirma que s’escrancarà pas tot sol e que lo caldrà bravament ajudar.
 
 
29 de setembre
 
Dus jorns abans lo referendum en Catalonha, l’estat espanhòl dona pas d’aire d’aver compres que li cal(driá) far Sant Miquel lèu-lèu.
 
 
1r d’octòbre
 
Lo colonialisme espanhòl se pòrta encara plan, subretot del costat de l’activitat bastonièra. Sos policièrs an pas perdut lo gaubi del temps del Franco e l’an quitament plan entretengut çò sembla.
 
Uèi son mai de uèit cents catalans que son estats tumats per de marcas d’amor tendre que cresián d’un autre temps.
 
 
3 d’octòbre
 
Cronica del colonialisme espanhòl: lo rèi Felipe VI a dobèrt la boca. Lo Borbon auriá melhor fach de ne beure un al lòc de dire … (ai decidit de demorar cortés).
 
 
6 d’octòbre
 
Lo Prèmi Nobel de la Patz per 2017 es estat atribuit tròp d’ora.
 
Felipe VI de Borbón, Mariano Rajoy, Pedro Sanchez del PSOE e la Guardia Civil se l’aurián meritat conjuntament per tot l’amor incompres qu’an per Catalonha dempuèi plan de temps.
 
 
8 d’octòbre
 
Barcelona: las dimenjadas se seguisson e se sembla gaire. Las moscas an cambiat d’ases? Non, cal pas tot confondre. Son los ases que se son venguts ocupar d’afars que son pas seus.
 
9 d’octòbre
 
Parlem / Hablemos” dins tot l’estat espanhòl (en defòra de la Generalitat de Catalonha) n’i a vestits de blanc que se desrevelhan e que dison que fin finala entre espanhòls e catalans es vengut lo temps de se parlar. Parlar Òc-ben … de las condicions del divòrci.
 
 
10 d’octòbre
 
A milierats avèm escotat la dicha del President de la Generalitat de Catalonha e Aran davant lo Parlament e a l’ora qu’escrivi sabèm pas se l’independéncia serà per l’an pèbre o l’an Ceset.
 
 
11 d’octòbre
 
“Òc-(ben) a l’independéncia, a l’optimisme” çò ditz la publicitat d’una marca francesa de jos-vestits femenins.
 
 
12 d’octòbre
 
A la una del Charlie Hebdo d’aquesta setmana se pòt legir:
 
Indépendantistes …  Les catalans plus cons que les corses … nous exigeons un débat” acompanhat del dessenh de tres cagolats. Quina tristesa!
 
 
13 d’octòbre
 
Divendres Tretze vèn de far una
 
Declaracion
Unilaterala d’
Independéncia
 
Per totes los pòbles de totas las nacions sens estat del monde.
 
 
27 d’octòbre
 
Dempuèi 15 oras 27 soi politicament UROS. A Barcelona lo Parlament de Catalonha a proclamat l’independéncia del país e la creacion d’una nòva republica.
 
Quant de temps durarà?
 
 
31 d’octòbre
 
Espanha refusa lo divòrci. Vòl empresonar lo govèrn de Catalonha que o demanda. L’article 155 de la constitucion espanhòla es una Declaracion Unilaterala d’Imperialisme.
 
Aguessètz de causir entre la libertat luènh del país e trenta ans de gabiòla per encausa d’un autre país qu’ocupa lo vòstre, que fariatz? Coma Carles Puigdemont!
 
 
19 de novembre
 
Dins lo restaurant de mon fraire lo jove, èrem un trentenat per celebrar en familha los 85 ans de la maire. Quand arribèri, un oncle, dus cosins, lo filh d’un autre cosin e un nebot me saludèron d’un “-Adiu Carles!” tant amistos coma gentament trufandièr en referéncia al Sénher Puigdemont. O prenguèri coma un omenatge.
 
 
24 de novembre
 
Coma o canta dempuèi plan de temps En Lluis Llach, mai que jamai en Catalonha “Cal que neixin flors a cada instant”. los nòstres cosins e vesins sabon asaigar lo casal.
 
 
16 de decembre
 
Dòna Alicia, la Presidenta del País De Las Meravilhas vèn de far una declaracion unilaterala de reconeissènça de la Republica Catalana. Espanha vèn de rompre las relacions diplomaticas.
 
 
18 de decembre
 
“L’independéncia de Catalonha es ineluctabla “ çò declarèt l’escrivan francés Michel Houellebecq que viu dins l’estat espanhòl.
 
Dins quauquas annadas farà la meteissa descobèrta per Corsega?
 
 
21 de decembre
 
Bis repetita placent
 
Los qu’an votat per Junts per Catalunya, per l’ERC o per las CUP o an fach per un fum d’autres que ne soi.
 
 
23 de decembre
 
Eri a Barcelona per la Diada de 2012 e 2015. Segon la Guardia Civil espanhòla, cada an los que manifestan per l’independéncia de Catalonha fan un acte de deliquéncia.
 
Soi plan content d’èsser estat delinquent d’aqueste biais e m’i tornarai tre que podrai.
 
 
30 de decembre de 2017
 
“Que 2018 sia un an prospèr, un an de progrès e un an d’armonia ont se gaudisca de valors constitutivas de la Republica: Libertat, Egalitat e  Fraternitat” çò ditz En Carles Puigdemont a la tota fin dels seus vòts al pòble catalan.
 
Es un messatge subliminal a França o m’engani?
 
 
 


abonar los amics de Jornalet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

t.
1.

Bernat LESFARGAS (que ven de nos quitar) :
" CATALONHA " (La brasa e lo fuòc brandal Ed.JORN)
Disi Catalonha
E vesi l'òrle de la mar
E sa lenga salada dins una calanca
Los pescaires
Donan al peis so nom de peis
Disi Catalonha
E vesi al pè del cingles
Una glèisa romana
E bevi una aiga freja
Per estancar ma set.
E la gent del campèstre
Dona a la font son nom de font
Al blat son nom de blat
E a l'ausèl son nom de vent.
Disi Catalonha
E vesi d'òmes que trabalhan
Dins de ciutats que son destin
Se farga en lenga catalana.
Lo pan, l'amor, la libertat
En drecha lenga catalana.
Disi Catalonha
E lo còr me dòl
Per mon pòble occitan
Que s'es plantat dins los pials
Las plumas de tres colors
D'un òrre gal.
E badascla que badasclaràs
En lenga tòrta e francimanda.

Disi Catalonha
Pr'amor que soi un òme
Que vòl una patria
Pas un taüt. Que vòl un brèç.
Ò Catalonha!
Quantas ne 'n donariái
Aora que sei arribat al mitan de ma vida
Quantas annadas
De las que me restan
Per veire sus Barcelona
Ondejar las quatre barras
E quantas
Per que d'aquela prima un fremiment
Sautant per dessús los Pirenèus
Vengue far tressalir los bòrds de ma
Dordonha
E se sente pus naut encara
Pels tèrmes verds del Lemosin
Onte s'acaba nòstra lenga
O veirai, aquò ?
Veirai sus quela tèrra estèrla
Timidament frotjar qauqua violeta
E bofar un vent
Qu'avalisca tot aquela femorièr ?

De tu me sarri, Catalonha,
E espèri,
Espèri.








  • 5
  • 1

Escriu un comentari sus aqueste article