Bandièra01 capçalera  1180x150: Novestivada

Opinion

Quin occitan (o galò, o breton, ...) volèm? Lengas de societat o lengas de sècta?

Torni prene lo títol au Gerard Joan Barceló per parlar d’un problèma important dins nòstes mitans: l’embarrament ideologic.Barceló escriu: “en Occitània, la lenga nòstra es mai sovent una lenga de clubs, limitada a qualques corses, a de cercles e cafès occitanistas e de curioses”.
 
Sei ben d’acordi amb lo Gerard. Mas voldriai anar mai luenh: en Occitània e Bretanha las lengas nòstras son mai sovent de lengas de clubs o des sèctas esquerristas.
 
Lo mot es dit: “esquerrista”, es a dire la malaudiá infantila de l’esquerra. Per çò que... quand legi lo Jornalet o d’autras publicacions occitanistas ai lo sentiment qu’Occitània es un grand camp d’estiu d’Alternative Libertaire. Pasmens, quand espïi una mapa electorala, i vesi gaireben.... l’antitèsi!
 
Jornalet es lo rebat del movement occitanista? Benlèu... non... òc... un pauc forçadament d’aprèp çò que sabi... mas es lo rebat de la societat occitana? Alavetz, cossí un movement de liberacion nacionala pot esser a còntra-corrent de sa populacion ?
 
 
En Bretanha  ‘quò es tot parèir, rasseguratz-vos. E tot aquò vira coma un estranglader. Dins las annadas 70 chaliá èsser, en gròs, de l’esquerra CFDT per esser militant breton. O “marxista” coma l’UDB (d’aquel temp, tot s’explicava pel marxisme, sabetz ben, de la recèpta de l’aïoli a la deriva delhs continents). Or, ara, per èsser militant breton chal èsser e d’esquerra, e antifa, e feminista, e vegan, etc. Crèsetz que la populacion bretona es tot aquò? Non, de segur. Mas lo movement breton a creat un estranglader d’ont pòt pus se sauvar.
 
Un jorn, demandèri a un amic perque voliá pas s’engatjar dins lo movement breton. “Pechaire?” Que s’exclamèt “me veses dedins aqueste mitan? Es l’aliança de la ZAD e de Boboland. Mercés ben mas ieu sei normal”.
 
En vertat avèm seguit las derivas de l’esquerra dempuèi quauques annadas: esquerra liberala d’un costat (Strauss-Khann > Macron), l’esquerra societala d’un autre. L’esquerra liberala s’emmoca de las lengas nòstras per çò que rentran pas dins lo mite de la “Start-up nation” que parla globish, demora l’esquerra societala... E aquì, ‘quò es una vertadierà deriva sectària. Per ço que l’esquerra societala europèa es dins una deriva sectària mortifèra ! Suicidària ! E nos-autres, seguisson coma un tropèl d’oelhas. Gara! Sei pas de dreita per aquò. Mas pensi sovent dins la frasa de Cècè Buteau cantador de Canta U Populu Corsu e militant FLNC “avèm tròp politizat la lenga”[i]. Duscas a ne faire una lenga de sècta?
 
A una epoca m’ocupavi d’una emission politica en breton, francés e galò sus la radio RBG: le “parlement breton”. Arrestèri après doas o tres emissions: quand era lo torn del debat en breton trobavi pas de britofònes de dreita! Tot simplament! Los neo-locutors avián totes lo meime perfiu.
 
Alavetz, que volèm? L’occitan, lo galò e lo breton lengas de comunautats omogenèas, menas de messas en latin, o volèm que sián de lengas de societat? De tota la societat !?
 
 
 
 
 
 
 
 
[i] Documentari “Génération FLNC”



 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Jean-Christophe Dourdet
29.

#16 Usatz d'un faus silllogisme, Gandhi tanben era en favor daus drechs de las bèstias. Bardot, l'i escupisse au cuòu.

  • 1
  • 4
Doblaud
28.

#18
Incultes ? E ben, me damande ben perqué disetz 'quò-'quí.

#23
A mens que chausisse de se paiar lo mesme salari que sos emplejats, non ? Mas 'quò deu pas 'ribar suvent !

  • 4
  • 3
Doblaud
27.

#16
Hitler era vegetarian.
Donc estre vegetarian , a partir de 'queu moment, ven un compòrtament de nazi ?

S'aprene que Macron aima lo fromatge, coma io tanben aime beucòp lo fromatge, forriá qu'arrestesse de ne'n minjar perque fau p'un piau aver los mesmes gosts, las mesmas ideias que de las personas qu'aimem pas ?

Sens rire ! E dijatz-me, si un jorn Marine Le Pen ditz que fau far quauquarren per l'occitan, 'restaretz de lo parlar ? Voudriá ben veire 'quò !

  • 12
  • 1
oksitanlaştıramadıklarımızdanmısınız Apraquital, tresena tenda apèi lo tuc còsta lo riu ont se banhan nusas las zègas a negrenuèch
26.

Se vèi qu’es una discutida bufèca, tinda cuc. Los sia disent aparaire de la cultura nòstra, aparan en realitat quicòm mai, s’amagan darrièr 50 annadas de malparadas escossentas dins totis los domènis que cargan sus l’esquina dels autres.

Aquò rai se trachon ben que truca l’afar, d’aqui l’eslogan : « loccitanisme deu cambiar » aronçat als 4 vents. Solament l’occitanisme cambia brica e cambiarà brica, l’occitanisme a pas la mesolha de se tornar pensar, la malautiá de l’ultrà esquerisme, de l’esquerisme e de son novèl retrach l’ecològisme (l’ecològia es autra causa), de santa Greta ambe son morrelon de coja, l’an anaquelit. Atal pivelat damora a l’occitanisme que de badar son bescant sansonha als quatre vents, que degun escota pus desempuèi un brave escag de temps !

anem zo fai virar tè.....

  • 9
  • 3
Lo martèl Empordan (Catalonha)
25.

L'idèia principala es de saupre distingir entre luta politica et luta per la lenga.

Son doas cosas totalament diferentas (o parallelas) e es una error de las confondre.
Dins la luta per la lenga i pòdon aver plan de posicions politicas pas solament esquerristas ...
Es atal qu o fasèm en Catalonha ... (mas encara avèm pas ganhat ...) ...

  • 10
  • 0

Escriu un comentari sus aqueste article