Bandièra01 1180x150: Comuna de Tolosa

Opinion

Lo retorn de la mostarda

Bernat Bergé

Bernat Bergé

Conegut coma lo “Bernat contaire” es escrivan e contaire de contes e ensenhaire retirat

Mai d’informacions

Tèxte legit

Una bona novèla, crida la premsa unanima, la fin del patiment, de la carestiá, de la privacion, de las laissas vuidas, de la vida dessaborosa, sens picant: la mostarda es a tornar, la mostarda torna! En Borgonha la recòlta 2022 de las preciosas granas tòca las cimas, los rendements son superiors d’un tèrç a los de l’an passat, se regaudisson los productors; a aquela produccion excepcionala cal ajustar l’arribada de las granas americanas. Aital, asseguran los mostardièrs, serem tornats a una produccion normala tre la fin de l’annada.
 
Rai d’esperar qualques meses, aurem de mostarda aquí ne vòls, aquí n’as, a ne onchar los patanons, las grasilhadas, los rostits, a’n assasonar las ensaladas, los pès de vedèl ravigòta, a ne tostejar lescas de pan! Es l’alegria, un sospir de solaç que s’escapa de totas las gargantas: òc, la mostarda es a tornar!
 
Ça que la, per èsser onèste, aquel regaudiment es benlèu pas a fèt partejat per totes, e d’unes aurián autant plan desirat que la carestiá durèsse encara un momenton. Ja, malgrat las laissas vuidas, mentre que oposicions e majoritat avián pas que fons de topins de mostarda seca a curar, los esternudaments an pas mancat a la Cramba al moment del vòte de la lei finanças rectificativa e de la de l’aumentacion del «poder de crompar». Qué serà quand los deputats auràn en abondància una mostarda fresca que monta encara mai aisidament al nas?


abonar los amics de Jornalet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article