Bandièra01 1180x150: Comuna de Tolosa

Opinion

Veitura d’Intelligéncia Artificala

Menar una veitura deven de mai en mai penós. Quora rotlas sus una nacionala e que dintras dins un vilatge as lo panèu 90, puèi cinquanta mètres aprèp lo de 80, cinquanta mètres aprèp lo de 50, cinquanta mètres aprèp lo de 30. Quora sortisses del vilatge passas de 30 a 70 puèi de 70 a 80, e trenta mestres aprèp a 90. Un còpacap vertadièr. E cada còp, quora passas davant lo radar – quora lo veses – as la peta d’aver passat l’òsca e de te far tirar de punts.
 
Dins las vilas grandas amb las ZFE sabes pas jamai s’as lo critèri bon. Amb lo UN semblariá que passèsses pertot. Amb lo CINC segur que demoraràs a las abroas de la ciutat. Se venes per te passejar, rai, podràs prene tas cambas, lo bus, lo tram o lo metro. Mas se siás fustièr o peirièr per anar trabalhar amb ton camion al centre vila, vernica! Te caldrà portar las fustas o las pèiras sus ta carreta-becana...
 
Abans dins las vilas aviás de camions, de petarèlas, de veituras e de caminaires a pè. Ara, se pòdes dintrar en vila, te cal far mèfi a las bicicletas, a las trotinetas que t’arriban per darrièr, per davant, per costat. Sens oblidar lo skate que punta sas rodetas ont las esperavas pas! Te cal de longa far mèfi a totes aqueles rodaires que los veses pas venir. Del temps qu’eles caminan a la lèsta, tu demòras aquí tancat coma un piòt dins ta caissa de fèrre!
 
Es ora que las Veituras d’Intelligéncia Artificiala, las V.I.A., portèsson prodèl als automobilistas. Amb de veituras enrodadas d’uèlhons intelligents ligats a un cervèl-veitura poderós podrián se menar soletas. Demesirián lor vitessa quora es nescite, l’augmentarián quora o podrián, aital pas pus besonh de menaire! N’acabarián amb aqueles panèus que paissèlan las rotas.
 
Las V.I.A. se tendrián de longa sus lor via e se foraviarián jamai. Acabat los menaires embeurats de tròp, encocaïnats de tròp. Acabatz los tusts sus las rotas e autòrotas. Acabatz los tuats e nafrats. Aital las V.I.A. estalvarián còs engrunats, vidas escanadas, sofrenças e plors. Lo temps de la seguretat rotièra vertadièra auriá enfin picat. 
 
Lo cervèl intelligent podriá calcular a la segonda prèp lo melhor itinerari tenent compte de las empachas que l’enròdan. Amb la reconeissença vocala, sufiriá d’afortir l’endrech ont anar e l’I.A. fariá lo demai. Calculariá lo melhor camin en fonccion de la meteò, de l’estat de la rota, dels “taps”... Saupriá adaptar sa vitessa a l’environa. Aital los radars desapareisserián. Acabat de chafrar amb lo G.P.S. que te mena de còps ont vòles pas anar.
 
Amb las Veituras d’Intelligéncia Artificiala, desprovesidas de menaires; deman serà un plaser vertadièr de se desplaçar en tota seguretat. V.I.A. sètz esperadas!
 
 
 
 
 
abonar los amics de Jornalet
 
 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

cissonet occitània
2.

Es que la V.I.A. Tolosana nos menarà a Compostela ?

Per quin camin anirà a Roma ?

E lo claxon, serà de besonh ?

  • 0
  • 0
cissonet occitània
1.

Es que la V.I.A. Tolosana nos menarà a Compostela ?

Per quin camin anirà a Roma ?

E lo claxon, serà de besonh ?

  • 1
  • 0

Escriu un comentari sus aqueste article