Bandièra01 1180x150: Comuna de Tolosa

Opinion

Testimòni de la repression policièra

Joan-Marc Leclercq

Joan-Marc Leclercq

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

Mai d’informacions
Aqueste 28 de març, èi participat un còp de mès a la 10au manifestacion a Tolosa contra la refòrma de las retiradas. Dempuèi la debuta deu movement, èi pas mancadas que duas marchas de totas las qu’estón organizadas.
 
Protèsti mens contra la refòrma que non pas contra la manca evidenta de Democracia que senhoreja dens l’Estat francés, on quauqu’un, per lo quau uns 19% de personas en edat de votar se son desplaçadas per botar un butletin a sa favor dens l’urna, se pòt retrobar dambe los plens poders e impausar çò que vòu, quitament se una grana majoritat deu pòble es contra.
 
Èra doncas pas ma purmèra manifestacion e, com de costuma, tot se passava dens un ambient fòrt brave, dambe una batucada, los camions deus sindicats que jogava cadun sa musica, un grop que cantava cançon coneishudas dambe lo tèxte adaptat a la situacion, e un concors de pancartas risolièras. Remarcoi una preséncia de joens ahortida.
 
Mes lèu lèu, tot cambièc, la manifestacion s’estanquèc. Au nivèu de Compans, una linha de policièrs barrava la carrèra. Imaginatz doncas una rengada d’un trentenat apelhats en tenguda de combat fàcia a 23 000 manifestants (chifra de la polícia era medish, doncas fòrça mès solide).
 
Es lavetz que vesoi arribar sòcis deu Black Block, (E PAS LO CONTRARI: es a díser qu’es pas la preséncia deus BB qu’a causada l’arribada deus policièrs), fin finala que son venguts meslèu per protegir los manifestants. Imaginèi qu’au lòc d’aquestes manifestants plan braves i avosse obrèrs metallurgics angleses o activistas bascos o còrses, lo pichon cordon policièr seré estat espotit sanhosament. Ren de tot aquò.
 
Los quites sòcis deu Black Block m’an semblat fòrça braves, son fòrça joens e meslèu chepicoses de lor paréisher, pas brica violents, i avoc doncas pas de castanha. Solide dits màgers levats, eslogans antipolicièrs, duas botelhas en plactic getadas, es tot.
 
Mes empachèc pas las fòrças deu desòrde devath los mandaments de Sénher Darmanin de lançar gases lacrimogènes sus la horrèra. Èra aquò la tòca. Jo medish estoc bravament asfixiat e una gojata en blosa blanca me balhèc una botelhòta de sérum fisiologic per m’apasimar los uelhs. Vesèvi pas ren.
 
Atau una bona part deus manifestants descorats prengóc la direccion deu Capitòli per se tornar a casa.
 
La malícia me gahèc encara mès l’endoman quan vesoi dens lo jornau ActuToulouse un article on lo conse de Tolosa denonciava “la violéncia deus manifestants que causèn uns 150. 000 euros de domaus a la carga deu contribuidor”. La manipulacion èra doncas escaduda.
 
Pòdi testimoniar que los policièrs an recebut l’òrdi de causar l’acarament en barrar la carrèra e puèi acusar uns “manifestants violents”, lavetz qu’èi rarament vista una horrèra tan brava davant la provocacion.
 
Ma colèra es pas prèsta de recàder…
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pascau
2.

Qu'i èri tanben mes ne vedoi pas lo començar de l'afrontament dab la polícia, qu'èri dens la coa deu cortègi e que devoi partir de cap a 16h30.

A dijaus : )

  • 1
  • 0
Franc Bardòu
1.

"Los quites sòcis deu Black Block m’an semblat fòrça braves, son fòrça joens e meslèu chepicoses de lor paréisher, pas brica violents, i avoc doncas pas de castanha. Solide dits màgers levats, eslogans antipolicièrs, duas botelhas en plactic getadas, es tot."

Ton prepaus recopa complètament mon experiéncia de "Gilet Jaune" e de recent contestatari anti-autoritarista de la macronalha. Los B.B. èra la soleta barralha de securitat (tota relativa) contra la delinquéncia policièra contra de manifestant pacifics e d'una mejana d'atge fòrça mai avançada que la dels arlèris en unifòrma que nos venián trucar dessús e gasar per res, per nos secutar e nos dissuadir de tornar manifestar. Son femnas e òmes sovent fòrça joves, tostemps fòrça coratjoses e valents…

  • 7
  • 1

Escriu un comentari sus aqueste article