Bandièra01 capçalera  1180x150: Novestivada

Opinion

Autres conselhs ortalans…

A de qué pòt plan servir una pelena sens linhas blancas?
A de qué pòt plan servir una pelena sens linhas blancas? | Paul Gillett
Alan Roch

Alan Roch

Responsable de l’IEO-Aude. Contaire,escriveire, cronicaire (ràdio, premsa escrita). Afogat de rugbi de 13.

Mai d’informacions

Tèxte legit

Vau perseguir aqueste còp la tièra dels conselhs indispensables per aver un òrt coma cal e un rapòrt positiu amb las fruchas e los legums.[1]

 

Çò que crenta lo mai lo mentraste es d’èsser remandat als trastes. Dança, dança lo menuguet, pichona menugueta! Lana de merinòs per la merinjana. Te sovenes del còp ont la merinjana balhèt rendètz-vos a una dama-jana? La perditz cocodesca al pè del micocolièr. Lo milh? En milhàs o en fetge gras, e pas mai. La caçòla es lo convent de las mongetas. Tiron, tiron: la muscada non es femna del muscat. Lo nap de Pardalhan es pas pels arpalhands. Lo nap de Pardalhan de tu farà un arpalhand. Qual manja nap de Pardalhan, se crei d’Artanhan. Cal sortir la napa bèla quand se manja naps. Abans de se colcar, la puput beu tisana de negreput. Ma paura dama, la nèrta vos daissarà inèrta. La paura notz ne demorèt sens votz. Per aver bona mina, l’estamina fila a l’estaminet. Las bonas olivas an la fòrma perfèita d’un balon de rugbí. Per un cagaròt, l’òrt ten l’espandi d’un continent. Qual-a ten un òrt a jamai tòrt. Cal pas èsser tòrt per trabalhar un òrt. Cal pas èsser tòrta per trabalhar una òrta. Las ortigas d’Artigas escafan las fatigas. La palavèrsa somia de faire la pipa-redòla. Paleja, paleja: ne demorarà totjorn quicòm. Lo palhatge estalvia l’asagatge. Palona, palona: ne demorarà totjorn quicòm. Visca los parpalhòls parpalholejaires, mas non als ortalans que parpalholejan! Lo parpèl capita pas de clucar de l’uèlh. La pasqueta pòrta pas casqueta. Flor de pasqueta, temps de meleta. Res non val la pastenaga de Galinagas. La pebrina vos balharà bona mina. Lo pebron es bon garçon. Pèl-de-ceba es un ploraire cronic. La pelena es afabrada pel passatge de tropèls[2] de singlars. A de qué pòt plan servir una pelena sens linhas blancas? Cal èsser piòt-a per persègre un perseguièr. La pervenca ten un orodator dins lo calici. Los peses secs crentan d’èsser trempes coma una sopa. Al pesquièr, lo cant de las granhòtas es la sinfonia de l’univèrs. Un vertadièr pibol deu mesurar 3,1416 mètres. Val mai aver un pibol traucat al fons de la prada qu’un pitt-bull a l’ostal. Lo pimèrle, amagatal pels mèrles. Pim-pè, pim-pom, lo pimparèl li an copat lo pè! La pimparèla se somia pim-pom d’aur. N’avèm lo confle d’aqueles pinhons qu’an una opinion sus tot e res. A l’ora tardièra, jogavan a plantapic dins la plantolièra. Quand Alaric pòrta capèl, te banharàs/ragentaràs lèu la pèl. La pluèja tomba fina sus las auberginas. La pluèja es d’una brava ajuda per l’asagaire fug-l’òbra. Lo paure Adam de longa se planhissiá: ”Es cada còp per ma poma!”, çò disiá. Fan pas de pomat a Pomàs. Las pompiras de Pompinhan valon plan un empèri. L’ortalan pòrta capèl e lo pòrre pòrta gòrra. Utiliza la posaraca e ditz: ”Lo potz arraca!”. Lo prat dalhat, te siás plan ganhat lo pan gradalhat.

E, al mes d’agost, se caliá pausar aquesta question: de qué, diantre, causir entre las amoras e las amors?

 

Ortalissa Roch

 

 

 

 

[1] Veire Papieròt del dijòus 15 de junh: Conselhs ortalans.

[2] Se considèra coma tropèl lo passatge de 16 bèstias plan cramponadas.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Zozime
4.

Coma es dimergue...

Lo Tolzan « òc Selvas » es a plantar de micrò selvas urbanas dins l’exagona.

Creada en 2020 l’entrepreza Tolzana « òc Selvas » fa servir un estèc japonés , qu’es a complantar d’albres sus una pichona surfacià entà crear pichonas selvas dins las vilas.

En doas tres parelhs d'annadas pòdon far un isclòt de frescor, de refregiment, d’ombra, de verdura et tanben formar una paret contra lo bruch e contra la polucion dins un emmòtle d’urgencià ecologic.

Quantes n’i a d’aquelses d’aquòs a Tolosa ?
S’ameritarià un retraís pempilhós amb’un reportatge de tria. La canhòtada se congosta, es pas tròp lèu d’aver una toda de verdura per las causas d’urgencias e levar la pata. Sabi pas s’an creat tanben quicòm per l’aire redolent que se passetja a l’entorn d’aquelas selvas urbanas asaigadas per la canhotada !

Lo còp que ven vos parlarai de « la carrièra dels Menestrals » una entrepreza tarnésa de maroquinarià luxósa (fan pas de sacas) qu’a una creauguda devèrs 15-20% de l’an e qu’estigança de se far a l’internacional.

  • 0
  • 0
Ortalissa Ortés
3.

Òsca pel Zozime de balhar conselhs mai pertinents que los mieus per trabalhar los òrts !!!!!!!!!!!!!!!!!!!!

  • 0
  • 0
Zozime
2.

Greenscope seduzis las entreprezas ambe son logicial de retraís RSE

Mens de doas annadas apèi sa creacion l’estartup peiregordina damorant al sud de Perigüers de Dordonha es a desvolopar una seguida de logicials per retraire a granda escala las donadas de durabilitat de las organizacions. Amai siòsquèssa jove d’edat capitèc de convéncer una pratica de granda dita e qu’avian mestièr d’apleches per recampar, recolegir e tractar fluísses grands de donadas.

Es atal que Bpifrance las bancas SG , banca Postala MACSF e qualques fonds d’investissament i fasquèron fisença.

  • 0
  • 1
Zozime
1.

La novèla pruna d’invèrn producha en occitània (region) arriva suls mercats.

Dempuèi Moissac, (Carcin bàs) « french fruit Lovers » alestís la pujada en potencià comerciala d’una novèla frucha : « la Lovita » d’una culhida tardiva es presentada tà pruna d’invèrn.
La Lovita es una color e un gost, pel gost rementarià cirèias. Frucha congostósa, nos ven d’un ibridaire d’Isarèl qu’alestís de mesclas d’agròs de mantunas varietats per fin de trobar solucions esvenidoiras que porgirian una milhona resisténcia als cambiaments climatics.

La Lovita es nascuda dins la valada del Jordan (Israèl) un agre ont se fa aisidament los 50 gras de temperatura.
Aqui avetz una novèla varietat de prunas que vos convida de tastar e contastar lèu e de nos fa saber vòstra albir.

  • 0
  • 1

Escriu un comentari sus aqueste article