Bandièra01 1180x150: País Invisible

Opinion

Per reviscolar la “Colòc”

Per reviscolar la “Colòc”
Per reviscolar la “Colòc”
Eric Roulet

Eric Roulet

Creator, compositor e contaire de la companhia de musica occitana Gric de Prat. Pedagòg e especialista en educacion. Es adara musician e professor d'occitan

Mai d’informacions

Lo Claudi Sicre que m’envièt un corric: “Hèsem una amassada dab los que son interessats atau de reviscolar una colòc a costat de l’universitat nòsta de La Guépia”.

L’idèia es de las bonas, solide, tant d’un punt de vista logistic com culturau. Sabem pas se trobaram quauqu’un per préner en carga l’ahar, mes l’escadença es balhada de presentar çò qu’estot los centres de vacanças occitans e lo perdequé d’aqueths campatges de joens. Nos vaquí donc encaminats dinc a La Guépia. Se lo camin es long, l’esper es gran: seré solide dus bons tant per la lenga com per los mainatges.

Un detzenat de monde es aquí quan arribam dens la sala. Lo Claudi Sicre presenta un abracat de l’idèia e torna díser tot l’interés de la causa. A nosauts d’explicar lo viscut passat e lo manejament d’una colòc (véser l’article “Que tornin las Colòcs” dens lo Jornalet). Cadun presenta sas pensadas e conta çò que poderè portar au projècte… Vistas de las bonas, escambis de bonas paraulas, mes digun dens l’amassada ne’s pòt engatjar dens las foncions las mei importantas per un projècte atau: l’organizacion pratica de la colòc e sa direccion. Son los dus ròtles “clau”: non podem pas esperar que s’espelissi la Colòc shens aver aqueras duas calhivas deu projècte.

E es de dòu, quan se vèi que fin-finau, una tropa d’elements son dejà amassats: avem lo lòc, avem bèra tropa de joens que vulhin i estar animators (sonque dab lo boca d’aurelha, avem ajut 4 prepausicions d’animators occitanòfones diplomats) e avem hòrt d’activitats possiblas, artisticas o autas. La presència a costat de la Colòc, de l’Univesitat de La Guepia, asseguraré de mei la possibilitat per los dròlles d’escambis culturaus de qualitat.

Aqueste article deu Jornalet nos pòt ajudar a trobar aqueths dus volontaris? Los legidors deu Jornalet se pòden har lo relambi de l’aperet? Solide, es en tot parlar e en tot escampilhar l’informacion que puiram, benlèu trobar las bonas personas…

Deisham donc detalhar un chic aqueths dus ròtles en tot saber que lo director pòt estar tanben l’organizator.

- L’organizator(a) pren en carga lo “materiau”: un còp lo lòc trobat e abilitat (mes aquò avem), i a tot un trabalh de tarrenc per aprestar las activitats possiblas, los contactes dab lo monde de l’endrèit, l’equipament en jòcs, libes e auts utís pedagogics.

Tot aquò decidit, fau pensar au costat legau: declaracion deu centre de vacanças e possibilitat d’obertura de la Colòc. Aquò se hèi en collaboracion dab lo(la) director(a).

L’estapa seguenta es la de la difusion de l’informacion que se deu har de dus biais:

  • apitar un desplegant de presentacion et d’inscripcion d’un costat

  • préner contact dab los organismes de Centres de Vacanças (FOL, CEMEA, UFCV, eca…) atau de n’en trobar un que vulhi incluir la Colòc dens sas prepausicions de centres de vacanças. Tot au long deus dètz ans qu’avem apitat Colòcs, es la FOL de Gironda que s’engadjèt a difusir, a costat de la nòsta difusion pròpri. Avem pas jamei mancat de dròlles (au contrari). Es solide qu’un organisme de Centres de Vacanças a una fòrça de difusion que podem pas aver una purmèira annada!

Tot aqueth trabalh demanda d’estar mei o mens sus plaça, o au mens de s’i poder portar aisiment… Aquí es lo trabuc.. . Mes dens l’amassada, i ajut plan de monde de l’endrèit que se prepausèren d’estar los correspondents suu tarrenc e de luenh enlà, podem tanben ajudar e guiar la navèth organizator.

I a plan d’ajudas possiblas dens la còla de l’Universitat de La Guepia, lo nòste organizator puiré estar mei o mens lo coordinator de las accions deus uns e deus auts.
  • Lo director deu estar diplomat o aver una equivalènçia deu diplòmi (balhada aus ensenhaires per exemple). Lo son ròtle es mei que mei pedagogic: amassar una equipa e apitar un project culturau en ligason dab los animators.

Aquí la clau de l’escasuda: lo projècte dèu estar soscat de longa!

Organizacion deu centre, de las activitats, atge deus mainatges, relacions dab los adultes, ròtles deus uns e deus auts…tot deu estar pensat en davant, e en tot préner l’amira deu ben-estar deus mainatges.

Solide que lo director dèu estar assabentat de çò que se passa sus plaça: dèu conéisher lo lòc, las activitats, lo monde principau de l’endrèit e trabalhar en ligason estrèita dab l’organizator (se son duas personas diferentas).

Es tanben lo director qu’es l’interlocutor legau de las autoritats, qu’amassa las inscripcions e guarda los papèirs demandats per la lei dens l’encastre deu Ministèri (Direction Jeunesse et Sport et Vie Associative)

Aquí tanben la nòsta ajuda serà permanenta (se lo director ic vòu): davant, pendent e après la Colòc: autant que l’experiència de dètz ans puisquí servir per l’avenidor.

En sus deu projècte de Colòcs, avem la possibilitat d’apitar un projècte collectiu, on cadun pòrta pèira per una realisacion comuna: de qué har saunejar un occitanisme que, a còps, s’a perdut de vista l’interès de tots…

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article