Bandièra01 1180x150: País Invisible

Opinion

Israèl-Hamas: un episòdi de la guèrra mediatica de mau engolir

Israèl-Hamas: un episòdi de la guèrra mediatica de mau engolir
Israèl-Hamas: un episòdi de la guèrra mediatica de mau engolir | Zakhor Online
Joan-Marc Leclercq

Joan-Marc Leclercq

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

Mai d’informacions

Ac sabètz dejà, la purmèra victima de la guèrra es la Vertat. E solide, dens l'acarament actuau entre l'armada israeliana e lo Hamas, totas las possibilitats de comunicacion son espleitadas, çò qu'es pas navèth dens una guèrra, levat que tecnicas modèrnas son apareishudas.

La purmèra question que's pausèc tre lo 7 d'octobre, èra de saber com Tsahal avèva pas protegits los estatjants d'Israèl, particularament los que demòran a costat de la frontièra dambe Ghaza. Segon los observators internacionaus, estoc una "error de las granas" que lo purmèr ministre devèva pagar car un còp lo conflicte acabat.

Jo, cresèvi meslèu que los servicis d'entresenhas israelians podèvan pas remarcar pas qu'una accion d'una tala amplor s'aprestissèva dempuèi autant de temps. Purmèr se digoc que lo Hamas avèva emplegat tecnicas "a l'anciana" sens telefonet ni ordenator, çò qu'èra passat devath los radars israelians. Mes lo govèrn egipcian declarèc qu'avèva alertat lo govèrn israelian que quicòm de gròs s'aprestissèva.

Ara, dempuèi lo 23 de noveme, una version oficiala navèra es presentada. Ne podètz legir en francés suu siti d'informacion israelian I24news que repreng la cadèna d'informacion Kan.

Segon lo jornau, Tsahal avèva en sa possession un "manifèste" deu Hamas qu'explicava haut o baish tota l'operacion, miada peus comandos aperats Nukhba, dambe tanben los mejans de desplaçament qu'estoren utilizats. Un "manifèste", per una accion secreta? Benlèu una error de traduccion …

Puèi, l'armada israeliana auré seguit e observat capvath la frontièra los exercicis deus comandos per aquesta operacion. Mes es ara que lo mès incresible se debanèc: l'informacion seré arribada a l'escalon mès haut de Tsahal qu'i auré pas cresut e qu'auré explicat qu'un tau scenari "èra pas qu'utopic".

Cadun hè çò que vòu, mes de mon costat, aquò me sembla de mau engolir. Un servici responsable de la seguretat deus sons conciutadans que deisharé pas lo mendre grad d'alèrta sus un dangèr potencialament imminent, estosse dens un film hollywoodian, trobarí que lo scenarista passa mesura.

Se los caps de Tsahal son talament pècs, aquò rassegura pas de saber que son eths que mian la guèrra a Ghaza per "eradicar lo Hamas".

Ma teoria es que Likod e Hamas son aliats objectius, totis dus vòlen la guèrra, e lo quite Netaniahó expliquèc aus sòcis de son partit que calèva deishar finançar lo Hamas per evitar atau una solucion de dus Estats. Lo Hamas, partit integrista de dreta extrèma qu'estoc ajudat dens sa creacion e dens las eleccions que ganhèc per l'Estat israelian que vésèva lo parat de combàter lo Fatah e atau dividir los Palestinians.

Après, me pòdi enganar, soi pas proprietari de la Vertat, mes totun, a còps, i a purgas que son de mau passar.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article