Per perlongar las explicacions del monde liure e particularament dels sistèmas operatius Linux, parlarai aquí dels environaments de burèu. Per utilizar la comparason de las veituras, òm pòt veire lo nuclèu Linux coma lo motor e los environaments de burèu coma la carroçariá e lo tablèu de bòrd. Vòstra causida dependrà de vòstres gostes. D’aisinas son tipicas de certans environament, coma lo gestionari de paquets, lo navigador de fichièrs, lo centre de contraròtle. Tot çò que tòca a las colors, los estils e los tèmas es diferent, pr’amor que se pòdon telecargar ressorsas independentament de l’environament causit.

Un còp causit qual sistèma operatiu volètz utilizar (Ubuntu, Debian, Linux Mint, Arch, Fedora, etc), avètz sovent la possibilitat de precisar vòstra seleccion amb una varianta, apeladas flavor chas Ubuntu o Spin chas Fedora. Per l’exemple preni las variantas d’Ubuntu aquí.

De basa Ubuntu es provesit amb l’environament de burèu GNOME. Mas la comunautat dels ubuntaires manten de variantas, notatz que sovent i a pas qu’una persona o doas darrièra tot lo trabalh d’adaptacion e desvolopament, encara que siá un risc per la continuitat del projècte.

Avètz Ubuntu MATE, qu’utiliza lo motor d’Ubuntu amb l’environament de burèu MATE, Ubuntu Budgie, Ubuntu Cinnamon,Ubuntu Unity o encara Ubuntu Kylin.

Las variantas apòrtan de modificacions dins la lista dels logicials preïnstallats, l’agençament dels menuts, d’optimizacions segon l’utilizacion ciblada. Prenèm Ubuntu Budgie, es sollicitada pel monde que venon del sistèma MacOS per exemple, los compòrtaments e las opcions se semblan. Dins son caire Ubuntu MATE es una alternativa que voliá rompre amb GNOME en gardant l’esperit de GNOME abans la version 3. Ubuntu Cinnamon es benlèu la varianta mai adaptada al monde que venon de Windows.

Çò melhor per causir es d’ensajar via una maquina virtuala (de tipe Virtual Box) o encara melhor amb una clau USB aital podètz verificar la compatibilitat amb vòstres periferics (imprimenta, numerizador, carta Wi-Fi, tauleta grafica, etc).

Ara la personalizacion grafica. Me prepausi de vos donar de ligams per veire çò que podètz aver coma interfàcia grafica per vòstre ordenador. GNOME-Look es un site per recuperar de ressorsas coma de tèmas, de cursors, d’icòns o encara de rèireplans. Se pòt filtrar los resultats segon las nòtas dels utilizaires o per data d’apondon. MATE-Look prepausa exactament lo meteis servici mas pels utilizaires de MATE. Coma autra font d’inspiracion i a los forums ont los utilizaire publican lor burèu e plan sovent en donant los ingredients per reproduire la recèpta. Sul forum d’Ubuntu MATE aquí: https://ubuntu-mate.community/t/my-desktop-today/129

Avètz tanben lo site Oh My God Ubuntu que prepausa una tièra de tèmas de descobrir: https://www.omgubuntu.co.uk/2017/11/best-gtk-themes-for-ubuntu

Per anar mai luènh dins la personalizacion avètz GNOME Tweaks e MATE Tweak. O encara las extensions de GNOME, installablas via Extension Manager.

Cada environament de burèu es un lòc de mai ont contribuir amb una traduccion en occitan. Los tèxtes son plan visibles al quotidian doncas es important de fornir una traduccion que siá complèta. De cap me sembla que los environaments de burèu mai traduches en occitan en òrdre descreissent son: GNOME, Mate, XFCE, Cinnamon.