Bandièra01 1180x150: País Invisible

Opinion

E cridarai quina!

E cridarai quina!
E cridarai quina!
Alan Roch

Alan Roch

Responsable de l’IEO-Aude. Contaire,escriveire, cronicaire (ràdio, premsa escrita). Afogat de rugbi de 13.

Mai d’informacions

Tèxte legit

Perseguissèm nòstre estudi etnologic e prospectiu sus la quina amb unas remarcas de bon sens:

  • Quand as pas qu’una quatèrna, te trapas plan patèrna/badèrna

  • Quand Gran-de-Milh s’i fasiá a la quina, totjorn sautava de l’un a l’autre e jamai fasiá lo carton plen

  • Cal pas doblidar lo camionatge, al risc de veire lo camionaire te faire lo morre e una coga de peis

  • De cinc, la quina ; de quinze, lo carton plen

  • Cossí la bòla que vira poiriá plan balhar un còp de sac ?

  • L’enquantaire es un brave numèro

  • L’enquantaire ne’n fa descantar mai d’un e mai d’una

  • Bolega, bolega, cridava lo collèga e son xx pel carton plen se perdèt dins lo borbolh

  • A la pausa, los cartons a mitat-prètz

  • Pescalhon e vin caud, aurem la crèsta roja

  • Vos cal pas demarcar: es un mainatge

  • Quina, se ditz pas: se crida o se brama!

  • La consolanta, plan sovent, vos daissa pas que los uèlhs per plorar

  • Pòrc gras, te vòli plan ganhar / Pòrc gras, diga-me lo bon carton / Per 50 sòus los 3 cartons / Pòrc gras, per tu, farai carton plen

  • Lo lòto es un jòc de velhada d’ivèrn. Lòto d’estiu val pas un piu-piu/un richiuchiu

  • Tampon jol carton es justificacion

  • Tristum: lo bon de reduccion del supermercat a remplaçada la polalha

  • Lo lòto de la television a res de véser amb la quina

  • Lo lòto esportiu segur que te melhorarà pas la condicion fisica

  • Jogar a la corsa de chavals t’ajudarà pas a te metre en sèla

  • Cal èsser un brave arganhòl per fairebookmaker

  • Al jòc d’argent, es totjorn l’asard lo ganhant e tu lo perdent

  • I a jorns ont un n° sortís pas: cada bòla a dreit a un temps de pausa negociat per la CGT-N (Confederacion Generala dels Trabalhaires Numerics)

Anem, encara un còp de sac e l’afar virarà al poèma: A la quina

La Justina,

Una nuèit de pluèja fina

Ganhèt una lapina

      La metèt dins una gabina

      A son ostal de Cabrespina

      Li balhèt d’aiglentina

      o d’albespina

Per qu’age bona mina

Dins la topina

Fauta de galina

Quand vendrà la cosina

De Canhac de las Minas

Que sòmia de sardinas ;

      E òc, la Justina

      Es plan malina

      E plan coquina.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article