Bandièra01 1180x150: País Invisible

Opinion

Soi mai que piòt…

Cossí fasián abans l’arribada dels piòts d’America lo monde per contar Joan lo Piòt o trapar que lo vesin èra un piòt de primièra o la vesina una piòta qu’es pas de creire…
Cossí fasián abans l’arribada dels piòts d’America lo monde per contar Joan lo Piòt o trapar que lo vesin èra un piòt de primièra o la vesina una piòta qu’es pas de creire…
Alan Roch

Alan Roch

Responsable de l’IEO-Aude. Contaire,escriveire, cronicaire (ràdio, premsa escrita). Afogat de rugbi de 13.

Mai d’informacions

Tèxte legit

E òc me sentissi mai qu’un piòt rapòrt a totas las questions de tota mena qu’i trapi pas una debuta de responsa: que siague una causa de pas res o una preocupacion fondamentala e universala. Demòri estabosit e boca badanta… Una pichona tièra non limitativa:

  • Piòts: Cossí fasián abans l’arribada dels piòts d’America lo monde per contar Joan lo Piòt o trapar que lo vesin èra un piòt de primièra o la vesina una piòta qu’es pas de creire…

  • Infinit: Del temps qu’èri a l’Escòla Normala, regularament veniá sul tapís la discutida per saupre se ”l’infinit mai un” èra mai grand que l’infinit? D’unis disián de òc; d’autres de non; d’autres estimavan que la question meritava d’èsser estudiada; d’autres, cercavan pas de saber…

  • Grasilhas: perqué comenci las grasilhas de mots crosats o sagelats pel fons?

  • Prefècte: Cossí fa lo còs prefectoral per aver un ecologista dins la tribú? Lo prefècte d’Aude ven de declarar que signariá cap de papièr e que balhariá cap de mejans financièrs pel projècte de gòlf e de complèxe d’ostalariá e de lòtjaments que d’unes interèsses financièrs comptavan de bastir en Montanha Negra. Un projècte d’un autre temps… estipulèt . Sabi pas se pensan de lo mutar dins Tarn per s’ocupar de l’autorota Castras-Tolosa? (Bon, es un exemple: pòt anar virar amb sas idèias dins plan d’endreits…)

  • Qu’es aquel procuror de Baiona qu’accèpta qu’una Basca de 28 ans agèsse son pichon nom basc, refusat a sa naissença per l’Estat civil (gaire civilizat) sus sos papièrs d’identitat amai se compren una ~: Aña! Un procuror que sap res de l’edicte de Villers-Cotterets, de l’abat Grégoire, de l’Academia francesa, de l’article 2 e de las proclamacions del President: ”França es una lenga”. Aquel procuror deu èsser un brave òme… Mas es que l’afar pòt faire jurispridéncia?

  • Pesticidas: Cossí saupre que son una salopariá de primièra e demandar de contunhar lor espandiment? Meteissa question amb los OGM…

  • Aiga: Perqué los païsans s’atissan a demandar mejans novèls d’irrigacion alara que i a de mens en mens d’aiga?

  • Nèu: Cossí l’Estat francés e las regions deis Aups se regaudisson d’èsser retengudas per organizar los Jòcs Olimpics d’ivèrn en 2030. Faràn sens nèu?

  • Cambiament de bòrd: Cossí d’aderents de partits d’esquèrra coma Die Linke en Alemanha viran l’esquina a lor ideal e a l’internacionalisme proletarian per passar de l’autre bòrd e presicar lo fòrabandiment dels estrangièrs?

  • Religions: Cossí se fa que las religions que presican patz e amor dels autres viren al fanatisme, als escomenges e a las guèrras?

  • Estudis: Aquí lo temps de la causida bèla pels liceans: l’algoritme de Parcours Sup va decidir de lor sòrt. Ara, s’avisan que se dintra nòtas dins la maquina algoritmica, mas que totes los professors nòtan pas del meteis biais e qu’aquò mena a plan de disparitat. Per un forum sus l’ensenhament superior, a Carcassona, an fait una aficha amb un jove plan embestiat a l ‘entrada d’un laberint. Lo pauròt es pas sortit de l’albèrga…

  • Saber: Perqué la revista Gai Saber sembla a un Tristum Saber: en plaça de balhar liure cors a l’inspiracion dels escrivans, d’unes n° semblan un tribunal d’Inquisicion ortografic e doblidan que tolerància e convivéncia son de virtuts occitanas…

Per çò qu’es de las questions que pausava lo Claudí Martí: perqué m’an pas dit a l’escòla la lenga de mon país, lo nom de mon país e la mòrt de Guevarà, me sembla que sabèm plan aquel perqué e que nòstre dever es d’i portar una responsa occitana. Mas de qu’es aquò una responsa occitana?

 

 

Glo-glo-glo Roch

 

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Perròta la vesia
2.

Super!

  • 0
  • 0
Lachaud
1.

Perqué, perqué, perqué demandar lo perqué a l'autre que sabam qu'a pas la responsa. L'autre se pausa pas tas questions; a ben pro de las soias que li pausan problems.
Perqué la vita, la politica se passan pas coma z'as pensar? Perqué i a de milions de monde que pensas pas coma tu? qu'an pas la mesma vita que tu? Que coneissei de la vita d'un paubre? de la vita d'un que fai partida de Raminagrobis aquela secta pauç nombrosas mas plan richa.
Lo paubre arabe o african a la mesma rason per emigrar que l'occitan que daisset la campanha per anar trabalahr en vila. Volia la securitat sociala mas la securitat sociala es devenguda una mana d'argent per Raminagrobis.
La vida es pas facha per te mas per Raminagrobis.

  • 0
  • 0

Escriu un comentari sus aqueste article