Bandièra01 1180x150: País Invisible

Opinion

Candelosa e sopa de coja…

Candelosa e sopa de coja…
Candelosa e sopa de coja…
Alan Roch

Alan Roch

Responsable de l’IEO-Aude. Contaire,escriveire, cronicaire (ràdio, premsa escrita). Afogat de rugbi de 13.

Mai d’informacions

Tèxte legit

Urosament que Candelosa es aquí, que manjam pescajons amb la causida de confiments tradicionals e naturals e que Dimars-gras s’acèrca per nos permetre, dins lo respècte de las costumas ancestralas, de faire Carnaval per que la vida contunhe al ritme tranquille luènh de las jornadas rescalfuradas e sens o tròp d’aiga.

Autrament, nos carcanhariam en seguissent las actualitats, las que tot lo monde ne parla e plan d’autras que nos acontentam d’un agach lèu-fait. Atal, coma se ditz a Matinhon:

  • Dreits de l’Òme: De contractes d’armament son en jòc entre França e India. Lo president Macron respond al convit de Mòdi que ven d’inaugurar un temple indó sus l’emplaçament d’una mosquèia que los fanatics destrusiguèron fa quauquas annadas. França es lo far dels dreits de l’Òme!

  • Pietat per nòstres còrs: Carton jaune a l’esquipa de Ftança d’hand-ball que nos gratifica de doas prolongacions (urosament victoriosas) en mièja-finala e en finala del campionat europèu.

  • Un pichon païsan: Lo president de la FNSEA es al cap d’una expleitacion de 700 ectars e patron del quatren grop agro-industrial francés . Sabi pas se mena sovent lo tractor…

  • Mesa en scèna: Es pas de faire una conferéncia entre quatre ballas de palha que farà creire que lo Primièr ministre francés compren quicòm a las questions païsanas; es pas en autorizant l’utilizacion de pesticidas que tendrà los objectius ecologics fixats (e doblidats); …

  • Santat: Ausit un dirigent de la FNSEA dire que la santat seriá una de lors preocupacions se recebián subvencions; aquò significa que per l’ora se foton coma de l’an 40 de la santat del monde e dels quites agricultors.

  • Sòuses: La fortuna del Bernard Arnault es estimada a mai de 200 milions de dollars. Fasètz calcul per saupre quant de SMIC e de RSA aquò representa. E lo govèrn francés s’arrefusa de taxar los rics…

  • Fangas rojas: A Gardana, l’entrepresa Alteo es mesa en examen amb l’acusacion d’aver escampat en Mr-editerranèu un produit mai que probable toxic? Aquò en ligason amb un cèrt nombre d’infraccions relevadas de 2016 a 2021. La justicia sap prene lo temps…

  • Làmias: La justícia demanda la reinscripcion de las làmias-tigres e de las làmias-dògols dins la tièra de las espècias protegidas del costat de Canaquia.

  • Conselh constitucional: Lo poder macronian a fait votar una lei sus la question de l’immigracion en desirant que venguèsse una non-lei que permetriá de faire creire qu’una lei demòra amb las intencions de crear mai de problèmas als migrants e, fin finala, a la societat en general. Soi pas segur que loMaquiavèl balhe una bona nòta a la manòbra!

  • Drama a la maquina de cafè: En Suèda, la tradicion dins las entrepresas e las administracions èra d’aver pausas-cafè dins las matinadas e las vespradas. Lo còst del cafè e dels acompanhaments èran fins ara preses en carga per las direccions. Ara, se viran cap al cafè de pagar e/o unas retengudas sus salari pels partesans de las pausas. Un novèl recul de la sociabilitat!

  • Decarbonar: Compreni pas aquela tissa de voler tot decarbonar. Sabi pas los problèmas que pausan a la societat los trabalhs e los escrits coneguts e reconeguts del Felip Carbona e perqué la comuna de Carbona deuriá cambiar de nom…

  •  Artistas e païsans: De veire als Abattoirs de Tolosa, del 1èr de març al 23 d’agost, una mòstra titolada “Artistas e païsans: batre lo campèstre”. Benlèu que s’i veirà un tablèu de la Joconda a preparar una sopa de coja…

 

 

Cogordet Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article