Bandièra01 1180x150: Comuna de Tolosa

Opinion

Libre novèl d’Adonis: Le Louvre espace de l’alphabet à venir

Libre novèl d’Adonis: <em>Le Louvre espace de l’alphabet à venir</em>
Libre novèl d’Adonis: Le Louvre espace de l’alphabet à venir

Le Louvre espace de l’alphabet à venir es una comanda passada pel Musèu del Lovre al poèta Adonis. Nascut a Ali Ahmad Saïd lo 1er de genièr de 1930 a Qassabine en Siria del Nòrd causiguèt coma escais “Adonis” quora publiquèt sos poèmas primièrs d’adolescéncia. Empresonat per sos engatjaments politics, aliberat sièis meses aprèp, s’enfugiguèt de Siria a vint-e-sièis ans. Ganhèt Beirot -Liban- ont farguèt òbra unenca. Publicats en 1961, “Les Chants de Mihyar de Damascène” foguèron una revolumada dins son trabalh e sa quista de modernitat. Fondator de revistas, pensaire, ensajaire, reviraire de Renat Char, Sant Jòhn Perse... Adonis farga una poësia davancièra, assorgada pel passat gloriós de la poësia araba e de la riquessa de la poësia occidentala. Conegut al Magrèb, en China, als Estats-Units, en Euròpa viu en França dempuèi 1985. Es ciutadan francés e comandant de l’òrdre dels Arts e de las Letras.

Dins la mitologia Adonis, èra òme jove plan polit, aimador de la divessa Afrodita. Es ligat a la ròsa e a la mirta. Divinitat orientala, son nom es segurament semitic. La rasiga ”Adon” vòlga dire “Senhor”.

Per embeurar son poèma, Adonis cabussèt dins lo Despartament de las Antiquitats Orientalas del musèu del Lovre. Pertocat foguèt per la primièra poetessa coneguda de l’istòria, Enheduannà. En sumerian En-hedu-ana vòl dire “La preiressa granda ornamenta del cèl”. I a mai de 4 000 ans, son nom foguèt gravat sus de tauletas d’argela. Sos poèmas, engravats sus de placas cuneïformas, son dedicats a la divessa Inannà, divessa de l’amor, del cèl e de la guèrra. Sas òbras las mai conegudas son: “La victoire d’Inannà sus l’Ebih, La déesse vaillante, l’exaltation d’Inannà” mas tanben una seguida de quaranta-dos poèmas jol nom de: Hymnes de temples sumériens.

Adonis s’apassionèt tanben per Gilgamesh, lo rei d’Uruk, en Mesopotamia mai que mai conegut per: “L’Epopée de Gilgamesh” òbra poetica granda sumeriana/babiloniana escrita dau la fin del tresen millenari abans J.C.

Lo libre que ven d’espelir foguèt escrit en lenga araba e revirat a l’oral en francés mot per mot per Adonis el meteis. Aiceste demandèt puèi al Donatien Grau de lo passar al francés escrit. Aquela edicion bilingüe publicada per Seghers es una meravilha vertadièra. Ofrissètz-vos un polit viatge, legissètz Adonis!

 


ADONIS. Le Louvre espace de l’alphabet à venir. Seghers, 2024. 144 paginas. 16 èuros.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article