D’aquesta passa, lo paure cronicaire, acostumat a escriure asenadas risolièras, a bravament perdudas las rasons de s’espetar de rire o just de sorrire a veire l’anar del monde en aqueste mes de novembre.

Lo musc que pòt faire tot petar…

E ben, brave monde, ara i sèm. Lo Trompeta se va tornar encargar de la presidéncia dels Estats-Units amb son sens afirmat de la moderacion e del dialògue. Es quicòm de véser qu’un país que s’es bastit sus las migracions e l’avaliment dels pòbles autoctònes age coma prètzfach de fotre defòra tot migrant que servís de mai a faire virar lor maquina industriala e economica. Es quicòm de véser coma las practicas de religions a lecturas barradas influisson sus la marcha de la societat.

Del temps, la planeta se recampa dins lo país nautament democratic d’Azerbaidjan per espepissar çò que se pòt faire contra lo rescalfament climatic que pel president Trompeta es pas qu’una farcejada per empachar de tirar fins a la darrièra gota de petròli e per interdire de fraccionar l’esquist.

Mencion especiala (espaciala?) pel ministre francés de la Foncion publica que saluda la nominacion del Musk al ministèri que vòl tot faire petar del foncionament de l’Estat american: significa que soetariá que i agèsse de mens en mens de foncionaris e mens en mens de politicas publicas, alara que justament son ròtle es de faire foncionar los servicis publics! S’es dins aquel estat d’esperit, val mai que se’n ane sulpic dins lo sector privat!

Per ne saupre mai sul demesiment de las politicas publicas e l’illiberalisme, lo locatari de l’Elisèu es anat galopar dins la Pampa amb lo president argentin.

Mas, la megafusada Space-X s’es petada lo morre a son lançament lo dimars 19 de novembre en preséncia del Trompeta e del Musk qu’a lo sòmi d’anar installar Terrians sus Març. Se podiá faire part del primièr viatge amb son collèga, nos daissariá mai tranquilles sus la planeta!

Aquò dit…

Aquò dit, podèm ajustar unas novèlas pescadas d’aicí e d’ailà:

• Pèrdre per ganhar: Los camins parlamentaris son estranhs. Lo govèrn francés se regaudís de veire lo budgècte amendat refusat a l’Amassada nacionala. Aquò li permet de tornar presentar lo budgècte original al Senat abans de poder sortir lo famós 49-3 que fa pas coma l’Astre Astruc (en fr.: Lucky Luke), mas que tira amb plan de pena democratica.

• Gòlf: Lo president sud-corean s’es tornat metre al gòlf. Se ditz qu’atal poirà anar jogar amb lo president Trompeta (una partida cada cinc jorns del temps de son primièr mandat) e qu’aquò li permetrà d’èsser en bon tèrme amb los USA…

• Onze vertats: Lo president Trompeta n’es al vintenat de proliferacion de messorgas dins la jornada. Pichon jogaire: supausi que pòt faire melhor.

• Enjòc ecologic: Lo president Trompeta nomena coma responsable de l’Energia un partesan de la fracturacion de l’esquiste. Vertat que, coma ditz lo president d’Azerbaidjan: « Petròli e gas son presents divencs!». La paura CÒP ne pren un còp!

• Justicia: Marina als jutges: « Me faguètz pas a ieu çò que demandi pels autres!». Polit programa!

• Patetic (e logic?): Lo Darmanin vòla al secors de la Marina. La marca de la volontat afortida d’una convergéncia?

• Mesprètz: «Los ensenhaires? 24 oras de trabalh la setmana pendant 6 meses! Qunas preparacions per la Granda Seccion?»Lo Nicolau Sarkozy a tot comprés al trabalh dels ensenhaires!

• Trichariá: Vinci a presentat un projècte financièrament jos-evaluat pel contornament oèst de Montpelhièr per esvitar totas las demarchas necessàrias e las consultacions qu’aurián entrainat lo còst real. Pareis qu’es una practica costumièra…

• Bandièra: Un tribunal administratiu interditz a la comuna de Nantas de faire ondejar lo gwen-ha-du sus sa faciada. Lo Conselh municipal de decembre tornarà decidir d’aquesta preséncia e parla de metre a l’òrdre del jorn lo referendum sus la reunificacion de Bretanha.

• Bilinguisme: Lo Pargue Natural Regional Corbièras-Fenolhedés estrena sos panèus de dintrada bilengas (francés-occitan o francés-catalan, segon las comunas) aqueste dijòus 28 de novembre. Un pichon pas per l’occitan…

• Revirada: Me dison qu’un instrument informatic de traduccion en occitan se ditz: Cagui!!!

• A gratis: En França, dempuèi lo 8 de novembre, las femnas òbran a gratís vist l’escart que se manten entre los salaris masculins e femenins.

• Mai fòrt que la setmana dels 4 dijòus: Mai d’un supermercat o magasin anóncia un Divendres negre d’una durada d’un quinzenat de jorns!

Luchas grandas…

• Jaurès: Cent ans que lo Jaurès es al Panteon; luchas grandas d’un còp èra…

• Comuna de Narbona: En 1871, lo cap de fila de la Comuna de Narbona, Emili Digeon, cerquèt de longa d’esvitar los afrontaments. Atal se pòt dire que la mostarda li montèt jamai al nas a Digeon!

Fialdactu Roch